Эвэртэн туурайтнуудаа даргадаа биш иргэдэд долгинооч!!!

Гэмт хэргийн илрүүлэлт нэмэгдсэн гээд баахан график хийгээд тавьчих юм. Гэмт хэргийн илрүүлэлт өсч байгаа нь сайн биз, хамаа алга. Хамгийн гол нь гэмт хэргээс урьдчилан сэргийлэх хэрэгтэй байна. Иргэд олон нийтэд гэмт хэрэг гардаггүй хороо, дүүрэг, гудамж талбай байдаг тухай мэдээлэл л хэрэгтэй байна. Түүнээс тэр олон график мэдээлэл огт хэрэггүй. Угаасаа л халаасны хулгайчид, дээрэмчиддээ баригдаж өтөх шахсан хотод амьдарч байгаатайгаа та бүхний яриад байдаг ард түмэн чинь эвлэрчихээд байна.
Тэр бүү хэл өглөө гэрээсээ гарсан хүн өдөр, орой хэн нэгэн новшийн гарт гэм зэмгүй байж өртөж амиа алдах, хүчирхийлүүлж доромжлуулах асуудал  маш их байсаар байна. Ийм байхад, шал худлаа харагдаж байна наад графикууд чинь. Үнэхээр худлаа санагдаад, харагдаад байгаа юм шүү дээ, цагдаагийн дарга нараа, гэмт хэргээс урьдчилан сэргийллээ гээд маш ихээр зурагт хуудас нааж тайлан гаргахаас илүү дорвитой ажилладаггүй Гэмт хэргээс урьдчилан сэргийлэх зөвлөл, ажлын албадын дарга нар аа, эвэртэн туурайтнуудаа… Ард иргэдийнхээ амьдрал хэрэгтэй, тэдний амь нас, эд хөрөнгийг үнэхээр хамгаалж чадаж байгаа ганцхан ажил л хийчихээд энэ гудамж, энэ талбай, энэ хороонд нэг ч гэмт хэрэг гараагүй, цаашдаа ч гарахгүй, бид ингэж ажиллаж чадлаа гээд мэдээ өгчих л дөө…
Гэмт хэргээс урьдчилан сэргийлэх чинь гарсан гэмт хэргийг илрүүлсэнээ ярих биш биз дээ… хэдий болтол ингэж андуурч ажиллах юм бэ, монголын цагдаагийн байгууллага… Өмнө ийм л байсан, үргэлж ийм л байна… гэдэг байдлаасаа гарч, үнэхээр гэмт хэрэг гарахаас урьдчилан сэргийлж чадаж ажиллаж байгаа тэр ажилтан ажилчдаа урамшуулмаар юм. Тэдэндээ урам өг л дөө. Дарга нарт таалагдаж урагшилдаг байдлаа л өөрчлөх цаг хэдийнэ болчихоод байна, цагдаагийн дарга нар аа, хууль зүйн яамныхаан, сэрээч наад нойрноосоо…

Сэтгүүлч Х.Ган-Ялалт