Агентлагууд цахим хуудсаа тогтмол хөтлөх шаардлагатай

Нийтийн алба ба ашиг сонирхлын зөрчил, Авлига албан тушаалын гэмт хэргээс урьдчилан сэргийлэх үйл ажиллагаа, түүнд оногдуулах хариуцлага сэдвээр Авлигатай тэмцэх газрын Урьдчилан сэргийлэх соён гэгээрүүлэх хэлтсийн ахлах ажилтан, ахлах комиссар Д.Дуламсүрэн холбогдох мэдээлэл сургалт хийлээ.

2017 онд Нийслэлийн нутгийн захиргааны байгууллагуудын  үйл ажиллагаа, ил тод байдал, удирдлагын ёс зүйн зөрчлийн талаарх холбогдох мэдээллийг хянах ажлын хүрээнд нийт 33 агентлагийн цахим хуудасны ил тод байдлыг хянаж үзэв. Ингэснээр цахим хуудаснуудын үйл ажиллагаа, шилэн данс, хүний нөөцийн мэдээлэл, газрын даргын тушаал шийдвэрийг оруулан байдал зэргээс үзэхэд 70 хувь нь мэдээллээ маш сайн оруулсан бол 25 хувь нь сайн, 5 хувь нь муу оруулсан дүгнэгдсэн байна.

Мөн мэдээ, мэдээллээ тогтмол оруулдаг 29 агентлаг, тухай бүр шинэчилдэг 3 агентлаг, нэг сараас дээш хугацаанд шинэчилдэг нэг агентлаг байна.  Харин газрын даргын тушаалыг тогтмол оруулдаг 7 агентлаг, сүүлийн 2-3 сарын хугацаанд багтааж оруулдаг 3 агентлаг, сүүлийн 3 сарын дотор огт оруулаагүй 23 агентлагт муу үнэлгээ тавьсан байна. Энэ бүх мэдээллийг гаргаж байгаа нь тухайн агентлагийн мэдээлэл олон нийтэд ил байж, байгууллагын сайтад байршуулах нь иргэд, олон нийтэд тулгарсан асуудлыг түргэн хугацаанд тогтмол шийдвэрлэх боломжийг бий болгодог хэмээн Нийслэлийн Засаг даргын Тамгын газрын дарга М.Отгонбаяр сургалт дээр хэлсэн үгэндээ онцолсон юм.