Автомашингүй өдрөөр дараах байршилд замын хөдөлгөөнийг түр хугацаагаар хаана

Автомашингүй өдрийг Улаанбаатар хот 13 дахь жилдээ зохион байгуулах гэж байна. Нийслэлийн Засаг даргын захирамж гарч энэ жилийн арга хэмжээг есдүгээр сарын 13-ны Бямба гаригт зохион байгуулахаар бэлтгэл ажил хангагдаж байна. Энэ жил “Автомашингүй өдөр-2025” арга хэмжээг “Эрсдэлгүй-эрүүл орчныг хамтдаа” уриа дор зохион байгуулахаар боллоо. Энэ хүрээнд Нийслэлийн эрүүл мэндийн харьяа байгууллага Сүхбаатарын талбайд иргэд олон нийтэд үнэ төлбөргүй үзлэг шинжилгээ болон өөр олон төрлийн арга хэмжээ зохион байгуулагдана.

Автомашингүй өдөр буюу 2025 оны есдүгээр сарын Бямба гаригийн 07:00-18:00 цагийн хооронд хааж автомашины хөдөлгөөнийг түр хугацаагаар хязгаарлана.

Дурдвал, Сүхбаатарын талбай (Д.Сүхбаатарын гудамж, Их сургуулийн гудамж) Сөүлийн гудамж, Чоймболын гудамж, Бөмбөгөр худалдааны төвийн уулзвар, Жуулчны гудамж, Баруун сэлбийн гудамж, Төмөрчний гудамж, Гэсэр сүмийн уулзвар, Самбуугийн гудамж, Анкарагийн гудамж, Бага тойруу, Бээжингийн гудамж, Залуучуудын гудамжны хөдөлгөөнийг хязгаарлана. Мөн Сансарын туслах замаар Энхтайваны өргөн чөлөөний зүүн дөрвөн замын уулзвараас баруун дөрвөн замын уулзвар, Чагдаржавын гудамж, С.Зоригийн гудамж, Элчингийн гудамж, Олимпийн гудамж, Гэндэнгийн гудамж, Д.Чойдогийн гудамж, С.Жамъяан гүний гудамж, Чингисийн өргөн чөлөөний Монголын хүүхдийн ордны уулзвараас Монгол шуудангийн уулзвар болон дотогш замуудыг түр хугацаагаар хаах аж.

Үүнээс гадна тус өдрийг тохиолдуулан томоохон худалдааны төвүүд амрахаар болжээ. Тухайлбал, Бөмбөгөр-1, Бөмбөгөр-2, Юмт, Содон, Алтжин бөмбөгөр, Нарантуул худалдааны төв, Дүнжингарав худалдааны төв, Өгөөмөр зах, Сандэй плаза ХТ, Шөнийн зах, Баянзүрх ХТ, Баянзүрх-2 ХТ, 100 айл орчмын барилгын материалын бүх дэлгүүр, Барс-1, 2 худалдааны төв, Хархорин, Шинэ сандэй, Ханталст, Да хүрээ зах, Цайз, Цолмонбадрах, Доной модны зах, Нарлаг дэнж, Нарантуул-2 гэх мэт томоохон худалдаа, үйлчилгээний төвүүд ажиллахгүй байна.