Хүлээцтэй хандаж сонгуульдаа идэвхтэй оролцохыг уриалж байна

УИХ-ын 2024 оны сонгуулийн санал хураалт зургадугаар сарын 28-ны Баасан гарагт буюу маргааш орон даяар явагдана. Энэ удаад монголчууд 126 нэр дэвшигчийг УИХ-ын гишүүнээр сонгоно. Ингэхдээ 126 гишүүний 78 гишүүнийг сонгуулийн тойргоос олныг төлөөлөх (мажоритор) аргаар, 48 гишүүнийг хувь тэнцүүлэн төлөөлөх (пропорционал) аргаар сонгоно.
Саналын хуудас нь сонгуулийн тойрогт нэр дэвшигчид өгсөн саналыг тэмдэглэх болон нам, эвсэлд өгсөн саналыг тэмдэглэх хэсэгт сонгуулийн тойрогт нэр дэвшигч, нам, эвсэл гэсэн хоёр хэсэгтэй байгааг сануулах нь зүйтэй юм. Хамгийн гол нь дөрвөн жилд ганцхан удаа болдог УИХ-ын сонгуульдаа монголчууд өөрсдөө идэвхтэй оролцож, саналаа өгөх хэрэгтэй. Ингэж байж одоогийн нийгмийн шүүмжид өртдөг бүхнийг өөрчилж сайжруулах эхний алхам болно гэсэн үг. Тиймээс, 18-35 насныхан сонгуульдаа оролцох идэвхитэй байж, 36- 59 насныхан санаачилгатай хариуцлагатай хандах ёстой. Харин 60-75 насныхан үр хүүхдийнхээ сайхан ирээдүйн төлөө зөв сонголт хийж, 76-гаас дээш насныхан шиг сонгуульдаа хүндэтгэлтэй хандаж оролцохыг уриалж байна.
Дашрамд дурдахад анх удаа УИХ-ын сонгуульд 1400 орчим хүн нэр дэвшиж буй. Том тойрог их өрсөлдөөнд ялалт байгуулах гэж их хэмжээний төсөв хөрөнгө зарцуулсан байж таарна. Харамсалтай нь бүртгүүлсэн бүхэн сонгогдох боломжгүй учир 126 нь сонгогдож УИХ-ын гишүүн болно. Сонголтод багтаагүй хүмүүсийн хувьд бухимдаж шаралхах нэг биш хүмүүс гарах биз. Гэвч өнөөгийн нийгэмд хэрүүл зодоон үймээн самуун хэрэггүй юм. Тиймээс хариуцлагатай хандаж бусдын ятгалга ухуулгад автаж буруу зүйлд автахгүй байхыг мөрч.мн сайтын редакци уриалж байна. Сонголт мэргэн, хүмүүс тайван, нийгэм амгалан байг.