Н.Баатаржав: Ослыг санамсаргүй хүчин зүйл боллоо гэж бид үзэж байна

Газ тээвэрлэж явсан автомашин нь дэлбэрлэсэн асуудлаар Дашваанжил ХК-аас мэдээлэл өглөө.

Н.Баатаржав

Дашваанжил ХК-ийн захирал Н.Баатаржав: Автоцистерн осолд орсонтой холбогдуулан мэдээлэл өгөхөд ослын газар ажиллаж байсан ОБЕГ-ын ажиллагсад амь насаа алдсанд нь нийт 600 гаруй ажилтныхаа өмнөөс эмгэнэл илэрхийлье.

Энэ удаагийн ослыг санамсаргүй юм уу, давагдашгүй хүчин зүйл боллоо гэж бид үзэж байгаа. Мөн осол болох үед гэмтсэн нийт иргэд болон тэдгээрийн ар гэрийнхэнд хурдан илаарьшихыг хүсэж байна.

Манай дотоодын үйлдвэрлэгчдээс бидэнд “Маш харамсалтай, давагдашгүй хүчин зүйл боллоо” гээд цаашид ажлаа амжилттай үргэлжлүүлээрээ гэж байгаа учир тэдгээр компаниуддаа талархаж байна.

Ослын талаар товчхон ярихад, манай компанийн ажилтан нь 1984 оноос хойш хүнд даацын автомашин барьсан туршлагатай жолооч, онц тээвэрчин хүн байгаа. Энэ хүн маань ажиллаж байх хугацаандаа ямар нэг осол гаргаж байгаагүй гэдгийг түүхээс нь тогтоосон. Манай компанид 2019 оноос хойш ажиллаж байгаа. Архи, тамхи хэрэглэдэггүй гэдгийг манай хүний нөөцөөс хэлж байгаа.

Дашваанжил ХК-ийн Хойд бүс хариуцсан захирал Л.Мөнхжаргал: Монгол Улсад хийн аж ахуйн аюулгүй ажлын тухай дүрэм байдаг. Энэ дүрмийн хүрээнд тухайн шингэрүүлсэн шатдаг хийг тээвэрлэхээр автомашинууд тоноглогддог. Мөн аюултай ачааг тээвэрлэх ачааны машины тусгай шаардлага, стандарт байдаг. Энэ хүрээнд бид тоноглоод шалгаж, үзлэг хийгээд явдаг. Одоогийн байдлаар орон нутаг болон хот дотор тээвэр хийж байгаа 20 орчим тээврийн хэрэгсэл байна.  

2019 онд Шадар сайдын гаргасан тушаалын дагуу аюултай ачааг тээвэрлэх маршрут гарсан. Энэ маршрутын дагуу бид явсан. Хуучин маршрут солигдсон гэж болно хэмээлээ.