Э.Мөнхбаяр: Шимэгчийн эсрэг бэлдмэлийг зааврын дагуу зөв хэрэглэхгүй бол бичил биетний тэсвэржилт үүсгэх өндөр эрсдэлтэй

“Бичил биетний тэсвэржилтийн талаарх мэдлэг, хандлагыг сайжруулах дэлхийн долоо хоног” арваннэгдүгээр сарын 18-24-ний хооронд дэлхий даяар тохионо. 

Энэхүү аяныг тохиолдуулан Мал эмнэлгийн ерөнхий газар, Улсын мал эмнэлэг ариун цэврийн төв лаборатори зэрэг холбогдох байгууллагуудаас хамтран өнөөдөр “Бичил биетний тэсвэржилтээс сэргийлэх чиглэлээр хэрэгжүүлж буй үйл ажиллагаа”-г танилцуулж, мэдээлэл хуваалцлаа. 

Малын эмийн үлдэгдэл, эм биобэлдмэл хариуцсан мэргэжилтэн Э.Мөнхбаяр хэлэхдээ “Хүнс, хөдөө аж ахуй, хөнгөн үйлдвэрийн сайд, Эрүүл мэндийн сайдын хамтарсан тушаалаар “Бичил биетний тэсвэржилтээс сэргийлэх салбан дундын үйл ажиллагааны төлөвлөгөө” 2022-2025 батлагдан харьяа байгууллагууд хэрэгжүүлэн  ажиллаж байгаа.

Мал эмнэлгийн салбарт өргөн хэрэглэгдэж буй бичил биетний эсрэг эм, биобэлдмэлийн тухайд:

1. Вирус, бактерийн эсрэг биобэлдмэл /89 төрлийн вакцин, таван нэр төрлийн эмчилгээний ийлдэс/
2. Шимэгчийн эсрэг бэлдмэл /170 орчим нэр төрөл/
3. Бактерийн эсрэг эм /антибиотик 110 орчим нэр төрөл/ байна.

Шимэгчийн эсрэг бэлдмэл болон бактерийн эсрэг эмийг зааврын дагуу зөв хэрэглэхгүй бол бичил биетний тэсвэржилт үүсгэх өндөр эрсдэлтэй” хэмээв.