Т.Ням-Очир: 73900 орчим хүүхэд нэгдүгээр ангид бүртгүүлэх урьдчилсан тооцоо гарсан

Боловсрол шинжлэх ухааны яамнаас хичээл сургууль эхлэх гэж байгаатай холбогдуулан мэдээлэл хийлээ.

Боловсролын ерөнхий газрын дарга Т.Ням-Очир: Энэ хичээлийн жилд улсын хэмжээнд 2-5 насны 302226 хүүхэд суралцахаар байна. Үүний 142798 нь Улаанбаатар хотын цэцэрлэгт хамрагдах ёстой. Өнөөдрийн байдлаар 89999 хүүхэд систем дээр бүртгүүлсэн байна. Өнгөрсөн хичээлийн жилд хүсэлт гаргасан хүүхэд бүрийг цэцэрлэгт бүртгэх хүрээнд төрийн өмчийн цэцэрлэгийн салбар бүлэг байдлаар 127 түрээсийн байрыг сургалтын зориулалтаар засаж тохижуулж 13800 гаруй хүүхдийг хамруулсан.

Бид бүртгэлийг хоёр үе шаттай зохион байгуулна. Энэ жилийн хувьд наймдугаар сарын 1-ний өдрөөс хойш харьцангуй хаягийн бүртгэл цэгцэрсэн. 15 хоногийн хугацаанд хаягийн бүртгэл, шилжилт хөдөлгөөнтэй холбоотой асуудал өнгөрсөн жилийнхээс бага байна. Хаягийн бүртгэл шийдэгдээгүй, гэнэтийн шилжилт хөдөлгөөн хийж байгаа түр оршин суугчдын хүүхдүүдийг хоёр дахь бүртгэлээр есдүгээр сарын 11-ний өдрөөс бүртгэхээр болсон.

ЕБС-ийн хувьд урьдчилсан байдлаар 40 мянга орчим хүүхдээр нэмэгдэхээр байгаа. Өөрөөр хэлбэл 35 мянган хүүхэд арванхоёрдугаар анги төгсөж, 73900 орчим хүүхэд нэгдүгээр ангид бүртгүүлэх урьдчилсан тооцоо гарсан. Тэгэхээр ойрын 1-2 жилд ЕБС-ийн ачаалал нэмэгдэнэ. Нийт нэмэгдэж байгаа ачааллын 50-60 хувь нь Улаанбаатар хотод байгаа. Үүнтэй холбоотойгоор нийслэлийн ЕБС-ийн ачааллыг бууруулах, гурван ээлжээр хичээллүүлэхгүй байх чиглэлээр Засгийн газрын 234 тогтоол гарсан. Учир нь, цэцэрлэгийн хүрээнд 100-300 хүртэлх хүүхдийг түрээсийн байр, хувийн цэцэрлэгийн сул орон зайг ашиглах зохицуулалтыг хийж болж байсан бол ЕБС-д 1000-3000 хүртэлх хүүхдийн хичээлийн байрыг шийдэх нөхцөл байдал үүсээд байна. Иймээс хөрөнгө оруулалтын ажлыг эрчимжүүлэх чиглэлээр Засгийн газрын тогтоол батлагдсан гэлээ.

Түүнчлэн, өнөөдрөөс буюу наймдугаар сарын 15-ны өдрөөс эхэлж ЕБС-ийн нэгдүгээр ангид суралцах хүүхдүүдийг бүртгэж эхэллээ. Ингэхдээ иргэд E-Mongolia системээр бүртгэлийг хийх юм.