Бүгд Найрамдах Солонгос Улсын “Скаутын холбоо”, Кёнги аймгийн “Нийгэм эдийн засгийн холбоо”, “Ахмад настныг асран сувилах газар”-ын төлөөлөгчид тус аймагт 2023 оны 06 дугаар сарын 24-27-ны өдрүүдэд зочиллоо. Энэхүү айлчлал нь тус аймгийн Дэлгэр, Халиун сумдын Засаг даргаар ажиллаж байсан Базар даргын ууган охин Б.Тэмүүлэнгийн санаачилгаар хийгдсэн юм.
Тус айлчлалын бүрэлдэхүүнд өнгөрсөн жил аймагт зочилж байсан хатагтай Жу Кён бок, ноён Ким Кирок болон бусад холбогдох хүмүүс багтсан бөгөөд аймгийн иргэдэд эрүүл мэндийн яаралтай тусламжийн үйлчилгээг хүргэх бүрэн тоноглогдсон автомашиныг буцалтгүй тусламжаар өгч байгаа юм.
Хамтын ажиллагааны хүрээнд:
1.Эрүүл мэндийн салбарт хамтран ажиллаж, жилд 30-аас доошгүй эмч, сувилагч, тусгай мэргэжилтэн болон бусад ажилчдыг БНСУ-ын эмнэлгүүдэд мэргэжил дээшлүүлж, туршлага судлахад дэмжлэг үзүүлэх;
2. Аймгийн Нэгдсэн эмнэлгийн нян судлалын лабораторит нэн шаардлагатай байгаа VITEK 2 compact бүрэн автомат аппаратыг нийлүүлэхэд туслалцаа үзүүлэх;
3.Скаут хүүхдүүдийн зун болон өвлийн camp /зуслан цугларалт/ солилцооны хөтөлбөрийг уламжлал болгон хэрэгжүүлж, жилд 100-аас доошгүй хүүхдийн солилцоо хийх;
4.Аймгийн ахмадын холбоотой хамтын ажиллагаа тогтоож, зөвлөх болон сайн дурын ажилтнуудыг ажиллуулах, туршлага судлуулах талаар харилцан санал солилцлоо.
