Н.Учрал: Ашигт малтмалын 2557 лиценз идэвхтэй байна

Монгол Улсын Засгийн газраас 2023 оныг “Авлигатай тэмцэх жил” болгон зарлаж, “5Ш” ажиллагааг явуулна гэдгээ албан ёсоор зарласнаас хойш сар гаруйн хугацаа өнгөрсөн байна. Тус ажиллагааны нэг болох “Шилэн” ажиллагааны хүрээнд өнөөдөр УИХ-ын гишүүн, ЦХХХ-ны сайд Н.Учрал мэдээлэл өглөө. 

     Тэрбээр “Ашигт малтмалын ордыг ашиглах тусгай зөвшөөрөл эзэмшигчийн мэдээллийг төрийн, хувийн өмч, гадаад дотоодын хөрөнгө оруулагчтайгаас үл хамааран ил болгож байна. Өнгөрсөн хугацаанд нийтдээ 6,178,816 га газар ашигт малтмалын лиценз олгогдсон байна. Нийт 2598 лицензээс 41 нь идэвхгүй, 2557 лиценз идэвхтэй байна. Уул уурхайн салбар ил тод байвал эдийн засаг эрүүл байна. Лиценз эзэмшиж ашиглах нь гэмт хэрэг биш. Өнгөрсөн долоо хоног хөдөө аж ахуйг дэмжих сангийн мэдээллийг нийтэд ил болгосон. Эхний ээлжинд 6092 ААН, ТББ байгууллага болон иргэний 52.4 тэрбум төгрөгийн зээлийн мэдээллийг ил болгож байв. Тэгвэл одоогийн байдлаар 880 ААН, ТББ, иргэний мэдээллийг нэмж оруулж байна. Энэ бол мэдээлэл хариуцагчаас ирүүлсэн мэдээлэл. Ингэснээр 82.1 тэрбум төгрөгийн зээлийн үлдэгдэлтэй болж өсч байгаа юм. Бид цаашид үлдсэн зээлдэгч нарын мэдээллийг ирүүлэхийг нэхэн шаардаж байна. Тус сангийн мэдээллийг ил болгосны дүнд 95 иргэн, хуулийн этгээд 232 сая 924 мянган төгрөгийн зээлийг эргэн төлсөн байна. Энэ бол мэдээлийг шилэн болгосны дүн” гэв.