Аймаг, сумын нутгийн зөвлөлийн тэргүүлэгчид, “Алтайн малчдын түншлэл-88” төсөл хэрэгжүүлэх малчдын төлөөллийн нэгдсэн уулзалт 2023.01.11-нд оройн 20:00 цагт Holiday inn зочид буудлын хурлын танхимд зохион байгуулагдлаа.
Тус уулзалтад аймгийн Засаг дарга О.Амгаланбаатар болон Улаанбаатар хот дахь Говь-Алтай аймгийн нутгийн зөвлөлийн тэргүүлэгчид, сумдын нутгийн зөвлөлийн тэргүүлэгчид, сумын Засаг дарга нар, малчдын төлөөлөл оролцож, аймаг орон нутгийн цаашдын хөгжлийн чиг хандлага, малын эзнээс үйлдвэрийн эзэн болох гарц шийдлийн талаар санал солилцож, эрдэмтдийн илтгэл, зөвлөгөөг сонссон юм.
Уулзалтын үеэр аймгийн Засаг дарга О.Амгаланбаатар:
“Говь-Алтай аймгийн 8000 малчин, 60000 иргэн хэн нэгэн ирж хөгжүүлэхийг, амьдралаа дээшлүүлэхийг хүлээж суух бус өөрсдөө нэгдэж, хүчээ нэгтгэн үйлдвэрээ байгуулж, малын гаралтай бүтээгдэхүүний үнээ нэмэгдүүлэх, үйлдвэрийн эзэн болох, үр хүүхэд хойч ирээдүйгээ орон нутагтаа өндөр цалинтай ажлын байраар хангагдаж, амьдрах нөхцөл боломжийг бүрдүүлэх хэрэгтэй. Бидний энэхүү үйл ажиллагааг Монгол Улсын Засгийн газраас дэмжиж, ТЭЗҮ-ийг боловсруулж өгөхөө илэрхийлсэн. Үйлдвэр байгуулах ажлаа цаг алдалгүй эхлүүлвэл та бүхний орлого ч мөн адил нэмэгдэнэ” гэдгийг онцолсон юм.
