XI сарын гүйцэтгэлээр улсын нэгдсэн төсвийн алдагдал ₮1.1 их наяд давжээ

Улсын нэгдсэн төсвийн зарлагын 64.9 хувийг урсгал шилжүүлэг, 3.8 хувийг татаас бүрдүүлэв

11 дүгээр сарын урьдчилсан гүйцэтгэлээр улсын нэгдсэн төсвийн алдагдал 1.1 их наяд төгрөг давсан нь өмнөх оны мөн үетэй харьцуулахад 39.3 хувиар буурсан болохыг Үндэсний статистикийн хороо мэдээллээ. Улсын нэгдсэн төсөвт оны эхний 11 сарын хугацаанд 14.4 их наяд төгрөг төвлөрсөн бол төсвөөс 15.5 их наяд төгрөгийн зарлага гарчээ.

Батлагдсан төсвөөр улсын нэгдсэн төсвийн нийт орлого 16.4 их наяд, нийт зарлага 18.1 их наяд төгрөг байхаар УИХ-аар баталсан юм. Мөн төсвийн алдагдал 2.3 их наяд төгрөг буюу дотоодын нийт бүтээгдэхүүний 5.1 хувьтай тэнцэхээр батлагдаж байв.

Төсвийн орлогын хувьд нэмүү өртгийн албан татвар, нийгмийн даатгал, бусад төрлийн татварын орлого нэмэгдсэн бол орлогын албан татварын орлого 13.1 хувиар буурсан дүнтэй гарсан байна.

Суудлын автомашины импорт 2021 онтой харьцуулахад тоо ширхгийн хувьд өссөнөөр суудлын автомашины орлогын албан татвараас 268.7 тэрбум төгрөг төсөвт төвлөрчээ. Засгийн газар энэ он дуустал зарим төрлийн авто бензиний орлогын албан татварыг “тэглэх” шийдвэр гаргасан юм. Үүнтэй холбоотойгоор импортын газрын тосны бүтээгдэхүүнээс төвлөрөх орлогын албан татвар 87.4 тэрбум төгрөг болж, өмнөх оны мөн үеэс гурав дахин буурсныг Сангийн яам мэдээллээ.

Улсын нэгдсэн төсвийн зарлагыг бүтцийн хувьд авч үзвэл 64.9 хувийг урсгал шилжүүлэг, 25.4 хувийг бараа үйлчилгээний зардал, 5.9 хувийг хүүгийн төлбөр, 3.8 хувийг татаас хэлбэрээр зарцуулсан байна.

Оны эхний 11 сарын хугацаанд 2.8 их наяд төгрөгийн хөрөнгө оруулалтын ажил хийгдсэнээс 2.1 их наяд төгрөг нь шинээр барьсан барилга байгууламжийн санхүүжилтэд зарцуулагджээ.

Мөн I-XI сарын хугацаанд нэмүү өртгийн албан татварын буцаан олголтод 310.6 тэрбум төгрөг зарцуулсан нь өмнөх оныхоос 8.2 хувиар нэмэгдсэн байна.