Нүүрсний экспортын дундаж үнэ болох 37.8 ам.доллар гурав дахин өсжээ

Монгол Улсын нүүрсний экспортын гол зам болох Тавантолгой-Гашуунсухайт авто замаар 239 компани нүүрс тээвэрлэж байна. “Эрдэнэс Монгол” компанийн орлогын 90 орчим хувийг бүрдүүлдэг тус замаар зорчих тариф 2016 онд км тутамд 2,650 төгрөг байсан бол одоо 3,300 төгрөг байгаа аж. 

Тус замыг анх төрийн мэдэлд шилжүүлэхтэй холбоотойгоор Монгол Улсын Хөгжлийн Банк “Эрдэнэс Монгол” ХХК-д 170.5 тэрбум төгрөгийн зээлийг олгож байв. Өөрөөр хэлбэл, замын орлогоор Хөгжлийн Банкны зээлийг төлөх шаардлагатай гэсэн үг. Үүний тулд ядаж амиа барья гэвэл км тутмын тарифыг 5,500 төгрөг болгох, харин зээлээ төлөх хэмжээнд ашигтай байлгахын тулд 15,000 төгрөг болгон нэмэгдүүлэх шаардлагатайг “Эрдэнэс Монгол” компанийн Санхүү, хөрөнгө оруулалтын газрын захирал Д.Баярбат хэлсэн юм. 

“Эрдэнэс Монгол” компани Гашуунсухайт авто замаас өнгөрсөн хугацаанд нийт 330 тэрбум төгрөгийн орлого олжээ. Үүнээс нүүрсний экспортын оргил үе болох 2018, 2019 онд 80 тэрбум төгрөгийн орлого олж байсан ч Хөгжлийн Банкны зээлээ төлж барагдуулаагүйгээс зээл болон хүүгийн төлбөр хуримтлагдаж ирсэн байна. 

“Эрдэнэс Монгол” компани Гашуунсухайт замтай холбоотой Хөгжлийн Банкны

зээлийн үндсэн төлбөрт 2019-2022 онуудад 127.9 тэрбум,

зээлийн хүү, нэмэгдүүлсэн хүүгийн төлбөрт 2015-2022 оны III улирлын байдлаар 97.1 тэрбум буюу
нийт 225 тэрбум төгрөгийг төлжээ. Үүнээс 117.2 тэрбум төгрөгийг өнгөрсөн есдүгээр сард төлснөөр хэвийн зээлдэгчийн ангилалд шилжиж, 42.6 тэрбум төгрөгийн өрийн үлдэгдэлтэй үлджээ. Энэ мөнгийг хүүгийн хамт 2023 оны 1 дүгээр улиралд багтаан төлж барагдуулахаар зорилт тавин ажиллаж байгаа юм байна. 
Замын тарифыг 2019 онд км тутамд нь 1,500 төгрөгөөр нэмэгдүүлж байсан ч жолооч нарын эсэргүүцлийн улмаас Засгийн газар болиулжээ. Харин өнөөдөр 2016 онтой харьцуулахад нүүрсний экспортын дундаж үнэ болох 37.8 ам.доллар гурав дахин өсөөд байгаа билээ.