Улаанбаатар-Өвөрхангай, Баянхонгор, Ховд, Баян-Өлгий аймгийг холбох гол зам болох Хүйтний хөндий- Арвайхээр чиглэлийн авто зам нь 1987 онд баригджээ. Энэхүү авто замд 2004 оноос хойш их засвар хийгээгүй маш их эвдрэлтэй учир иргэд, тээвэрчид зорчиход хамгийн хүндрэлтэй авто замуудын нэг байв.
Харин Азийн хөгжлийн банкны санхүүжилтээр өнгөрсөн дөрөвдүгээр сард их засварын ажил нь эхлүүлж, авто замын бүтээн байгуулалтын ажил амжилттай үргэлжилж байна. Замын бүтээн байгуулалтад 150 гаруй ажилтан, 70 гаруй тоног төхөөрөмж ажиллаж байгаа бөгөөд 50 гаруй туслах ажилтныг тухайн орон нутгаас ажиллуулж байна.
Хүйтний хөндий-Арвайхээр чиглэлийн авто замын их засварын хүрээнд хуучин замыг бүрэн сэргээн шинэчилж, шинэлэг шийдлээр хийгдэж буй бөгөөд хуучин 5 см асфальт бетоныг доод суурьтай нь 25 см зузаан цементээр бэхжүүлж, дээр нь 5 см харлуулсан суурь асфальт цутгасны дараа нэмж өнгөн асфальт 3 см хийх юм.
Хуучин асфальт бетоныг суурьтай нь бэхжүүлэх энэ технологийг Монголд өмнө нь хэрэглэж байгаагүй бөгөөд замын чанарт ихээхэн давуу талтай технологи гэдгийг мэргэжлийн хүмүүс үнэлж байна. Авто замын их засвар 2023 оны дөрөвдүгээр сард бүрэн дуусаж, ашиглалтад оруулна. Замын чанар, арчлалтыг гүйцэтгэгч компани ашиглалтад оруулснаас хойш гурван жилийн хугацаанд бүрэн хариуцна гэж ЗТХЯ-наас мэдээллээ.
+ There are no comments
Add yours