Самар түүхийг хориглох эсэхийг ирэх сарын эхээр шийдвэрлэнэ

Хуульд зааснаар есдүгээр сарын 10-наас ирэх оны гуравдугаар сарын 15-ныг хүртэл самар түүхийг зөвшөөрдөг. Харин энэ жилийн нийт нутгийн самрын ургацын дүгнэлт ирэх сарын эхээр гарсны дараа самар түүхийг хориглох эсвэл зөвшөөрөх эсэх шийдвэр гарах юм.

Энэ талаар БОАЖЯ-ны Ойн бодлого, зохицуулалтын газрын дарга Э.Сансарбаяр:
Монгол орны нийт ойн ес хүрэхгүй хувийг хуш мод эзэлдэг. Есдүгээр сарын 10-наас ирэх оны гуравдугаар сарын 15-ныг хүртэл ахуйн болон үйлдвэрийн зориулалттай бэлтгэхийг зөвшөөрдөг.

Есдүгээр сард түймэр гарах нь элбэг. Ялангуяа ойд самар түүж байгаа иргэд санамсаргүйгээр түймэр тавих эрсдэл ихэсдэг.

Тухайн орон нутгаас самрын ургацыг тогтоодог ба 50 хувиас дээш байвал түүхийг зөвшөөрдөг хуультай. Их ургац дөрвөн жил тутамд тохиодог ба наймдугаар сардаа багтаад ургацын хувь хэмжээг орон нутгаас тогтоодог. Аймгуудаас тодорхойлолт ирэхэд нь ойн судлалын төв дүгнэлт гаргаж түүж болох эсэхийг тогтооно.

Баруун аймгуудад ургац тааруу, төвийн аймгуудад 50 хувиас дээш ургацтай байна. Есдүгээр сард түймэр гарах нь элбэг. Ялангуяа ойд самар түүж байгаа иргэд санамсаргүйгээр түймэр тавих эрсдэл ихэсдэг. Тиймээс ургацын судалгаа, дүгнэлтийг гарсны дараа самар түүхийг хориглох уу, зөвшөөрөх үү гэдэг нь есдүгээр сарын эхээр тодорхой болно.

Самрын болц гүйцэхээс өмнө “мунадах” буюу цохиж доргиох аргыг хэрэглэдэг ч энэ нь модыг маш ихээр гэмтээдэг. Самар нь тухайн байгальдаа үлдэх үр учраас сэргэн ургалтад нөлөөлдөг.