Согтуурсан үедээ голын усанд живжээ

48 настай иргэн согтууруулах ундаа хэтрүүлэн хэрэглэсэн үедээ гэрээсээ гарч, голын усанд живсэн байж болзошгүй хэрэг гарчээ.

Тодруулбал, Ховд аймгийн Мянгад сумын Чацарганат багийн малчин зургадугаар сарын 2-ны 00:30 цагт гэрээсээ гараад сураггүй алга болсон байна. Тэрбээр согтууруулах ундааг хэтрүүлэн хэрэглэсэн байжээ. Түүнийг голын усанд живсэн байж болзошгүй гэж ар гэрийнхэн нь болон албаныхан таамаглаж буй аж.

Энэ тухай дуудлагыг зургадугаар сарын 2-ны 09:12 цагт Онцгой байдлын газар хүлээн авсан байна. Улмаар аймгийн Онцгой байдлын газар, Цагдаагийн хэсгийн алба хаагчид тус сумын Засаг даргын Тамгын газрын ажилтнууд, орон нутгийн иргэд иргэн Ц-ийг “Цоохор харгана” гэдэг газраас “Цахирын-Үзүүр” гэдэг газар хүртэл 15 киломерт газар завиар, Ховд голын эрэг дагуу найман километрт явганаар эрэн хайх ажиллагааг зохион байгуулсан ч үр дүнд хүрээгүй байна. Тиймээс 23:00 цагт эрлийг түр зогсоож, зургаадугаар сарын 03-ны 07:00 цагт эрэн хайх ажиллагааг дахин эхлүүлжээ.