Олимпын хөл бөмбөгийн төрөлд оролцох 16 багийн нэрс тодорлоо

Токиогийн олимпын хөл бөмбөгийн төрөлд оролцох 16 шигшээ багийн нэрс тодорлоо. Олимпын эрэгтэй хөл бөмбөгийн тоглолт долоодугаар сарын 22-нд Египет, Испанийн тоглолтоор эхлэх бөгөөд хэсгийн тоглолтууд долоодугаар сарын 28-ныг дуустал үргэлжилнэ.

Олимп нь сонирхогчийн спортын наадам тул хөл бөмбөгийн төрөлд 23-аас доош насны тамирчид тоглодог боловч баг бүр гурван тоглогчийг насны хязгааргүйгээр оролцуулах боломжтой байдаг.

Энэ удаагийн олимпод

Ази тивийг төлөөлж Япон, Өмнөд Солонгос, Саудын Араб, Австрали
Европ тивийг төлөөлж Герман, Испани, Франц, Румын
Хойд Америк тивийг төлөөлж Мексик, Хондурас
Өмнөд Америк тивийг төлөөлж Бразил, Аргентин
Африк тивийг төлөөлж Кот д’Ивуар, Өмнөд Африк, Египет
Номхон далайн арлын орнуудыг төлөөлж Шинэ Зеланд оролцох юм.

Өмнөх Рио-2016 олимпод Бразилын шигшээ баг Германыг хожин түрүүлж байсан билээ. Олимпын хөл бөмбөгд Унгар болон Их Британийн шигшээ баг хамгийн олон буюу тус бүр гурван удаа түрүүлж байсан бол Аргентин 2, ЗХУ 2, Уругвай 2 удаа түрүүлж байв.

Харин хөл бөмбөгийн ДАШТ-ий дөрвөн удаагийн аварга Герман, гурван удаагийн мөнгөн медальт Нидерланд, 2018 оны Европын аварга Португалийн багууд олимпод түрүүлж үзээгүй юм.

Эх сурвалж: FIFA