Засгийн газраас COVID-19-ийн эсрэг иргэдийн амьжиргаа, эдийн засаг, бизнесийг дэмжих чиглэлээр авч хэрэгжүүлэх хариу арга хэмжээний 10 их наяд төгрөгийн төлөвлөгөөг хэрэгжүүлэхээр болсон. Тэгвэл 500 тэрбум төгрөгөөр залуусын фитнест явах хоёр сарын төлбөрийг төрөөс даана гэх мэдээлэл цахим орчинд тархсан билээ.
Уг мэдээлэлд Засгийн газрын Хэвлэл мэдээлэл олон нийттэй харилцах хэлтсийн дарга Ц.Ганзориг тайлбар өглөө.
Тэрээр “Эдийн засгийг дэмжих 10 их наяд төгрөгийн хөтөлбөрөөс залуусыг фитнест явуулахад 500 тэрбум төгрөг зарцуулна гэдэг худал. Зарим хүмүүс фитнесийн хоёр сарын төлбөрийг төрөөс даана гэж ойлгосон бололтой. Энэ мөнгийг залуусыг ажлын байранд бэлтгэхэд зарцуулах бөгөөд Хөдөлмөр, нийгмийн хамгааллын яам бэлтгэл ажлыг хангаж байгаа. Залууст богино хугацаанд мэргэшил олгоод, цалин өгөх бодлого юм. Өөрөөр хэлбэл, ажилгүй байгаа залуусыг хоёр сарын хугацаатай багц сургалтад суулгаж, мэргэшил олгож, ажлын байранд бэлдээд нэг сая төгрөгийн урамшуулал олгоно” гэв.
+ There are no comments
Add yours