Коронавирусийн шинэ хувилбар АНУ-д анх удаа бүртгэгджээ

Их Британид анх илэрсэн халдварлах чадвар өндөртэй коронавирусийн шинэ хувилбар B.1.1.7 АНУ-ын нутаг дэвсгэрт анх удаа бүртгэгджээ.

Энэ талаар өчигдөр Колорадо мужийн оршин суугч 20 гаруй насны эрэгтэйгээс уг вирус илэрсэн тухай тус мужийн захирагч Жаред Полис твиттер хуудасаараа  мэдээлжээ.

Полис мэдэгдэлдээ халдвар авсан өвчтөн нь Денвер хотноо тусгаарлагдсан хүн байсан гэжээ.

Өвчтөн нь ойрын үед гадаадад аялсан түүхгүй байсан тул вирусийн халдварыг хаанаас авсныг мөрдөж, тодруулах ажил эхэлжээ.

АНУ-ын халдварт өвчин судлалын мэргэжилтнүүд коронавирусийн шинэ хувилбар мэдэгдэлгүйгээр хүн амын дунд тархсан байх өндөр магадлалтай гэж дүгнэж байна.

B.1.1.7 гэж нэрлэгдэж байгаа шинэ хувилбар одоогоор Өмнөд Солонгос, Япон, Испани, Австрали, Канад зэрэг дэлхийн 17 оронд илрээд байгаа юм.

Өнгөрсөн долоо хоногоос эхлэн АНУ-ын засаг захиргаа Их Британиас ирэх зорчигчдоос коронавирусийн халдваргүйгээ батлах оношилгооны дүгнэлт шаарддаг болжээ.