Нийслэл Улаанбаатар хотод нэн яаралтай шийдвэрлэх шаардлагатай асуудлын нэг бол агаар, хөрсний бохирдол үүсгэж байгаа гэр хорооллыг дахин төлөвлөх, инженерийн хангамжаар хангах асуудал билээ. Гэр хорооллын иргэдийн хүсэлт, санаачилгад суурилан иргэний өмчлөлийн газар, амины орон сууцанд нь инженерийн болон нийгмийн дэд бүтцийг хүргэх замаар гэр хорооллын нутаг дэвсгэрийг орчин цагийн хотын соёл, нийгмийн хэрэгцээ шаардлагад нийцсэн, уламжлалт өнгө төрхийг хадгалсан, эрүүл аюулгүй, тохилог орчин болгон хөгжүүлэх зорилгоор 200-300 нэгж талбарт инженерийн дэд бүтцээр хангах төслийг хэрэгжүүлж байгаа билээ.
Нийслэлийн иргэдийн Төлөөлөгчдийн Хурлын 2019 оны 118 дугаар тогтоолоор дэд бүтцийн төсөл хэрэгжих 16 байршил батлагдаж, эхний байршил болох Чингэлтэй дүүргийн 7 дугаар хорооны нутаг дэвсгэрт 220 нэгж талбар, 14 га газрыг хамран, цахилгаан, дулаан, халуун хүйтэн усны хангамж болон бохир усны цэвэрлэх байгууламж бүхий явган хүний болон засмал зам, камержуулалт, гэрэлтүүлэг, ногоон байгууламж бүхий Дэд бүтцийн төвийн төсөл амжилттай хэрэгжин, улсын комисс хүлээн авч, ашиглалтад орон, үйл ажиллагаа нь жигдрээд байна.
Энэ удаа нийслэлийн Налайх дүүргийн 1-р хорооны нутаг дэвсгэрт 20.0 га газрыг хамруулан инженерийн дэд бүтцийн төсөл хэрэгжүүлэхээр өнөөдөр ийнхүү нээлтээ хийж байна. Уг төслийн хүрээнд инженерийн дэд бүтцийн шийдлээр дараах ажлуудыг хийж гүйцэтгэнэ.
· Дулаан хангамж: Бие даасан байдлаар цахилгаан халаалтаар айл бүрт шийдэх
· Усан хангамж: Налайх дүүргийн төвийн шугам сүлжээнд холбох
· Ариутгах татуургын хангамж: Налайх дүүргийн төвийн шугам сүлжээнд холбох
· Цахилгаан хангамж: Төвийн шугам сүлжээнд холбох
· Тохижилтын ажил: Жишиг гудамж тохижуулах
Нийслэлийн Засаг даргын 2020 оны 03 сарын 24-ний өдрийн А/398 тоот захирамжаар нийслэлийн Орон сууцны дэд бүтцийн газарт тус төслийг хэрэгжүүлэх компанийг сонгон шалгаруулах худалдан авах ажиллагааг зохион байгуулах эрх шилжин ирсэн бөгөөд төсөл хэрэгжүүлэгчийг шалгаруулах үйл ажиллагааг зохион байгуулж, “Төгс Шийдэл Хийц” ХХК шалгаран ажлаа эхлүүлж байна.
Тус компани нь 2013 онд байгуулагдсан, барилга, дэд бүтцийн чиглэлээр үйл ажиллагаа явуулдаг. Хувийн хэвшлийн дотоодын болон гадны хөрөнгө оруулалттай төслүүд дээр үндсэн болон туслан гүйцэтгэгчээр ажиллаж байсан. Энэ удаа компанийн үйл ажиллагааг өргөжүүлэн тус төсөлд шалгарсан.
Тус төсөл хэрэгжсэнээр Налайх дүүргийн 1 хорооны Баянзүрх хэсгийн 201 айл өрх халуун хүйтэн ус, цахилгаан дулаанд холбогдохоос гадна бохир усны шугамд холбогдоно. Мөн төслийн хүрээнд ариутгах татуургын төв шугамын өргөтгөлийг ажил хийгдэх бөгөөд ингэснээр дүүргийн хэмжээнд тулгамдаад байгаа инженерийн дэд бүтэцтэй холбоотой асуудлууд шийдвэрлэгдэх боломжтой болох юм.
