Туул, Сэлбэ, Дунд голын эргийн дагуу эрүүл мэнд, соёл, амралтын орчныг бүрдүүлнэ

Нийслэлийн ИТХ-ын Тэргүүлэгчид хуралдаж Баянзүрх, Баянгол, Хан-Уул, Сүхбаатар дүүргүүдийн нутаг дэвсгэрт хамаарах Туул, Сэлбэ, Дунд голын эргийн дагуу иргэд, олон нийтийн тав тухтай амарч зугаалах, чөлөөт цагаа зөв боловсон өнгөрүүлэх нөхцөлийг бүрдүүлэх зорилгоор тус орчмын газарт эрүүл мэнд, соёл, амралт, цэцэрлэгт хүрээлэн, ногоон байгууламж бий болгох төслийг төр, хувийн хэвшлийн түншлэлийн хүрээнд хэрэгжүүлэх тогтоол баталлаа. Нийслэлийн засаг даргын 2016-2020 оны үйл ажиллагааны хөтөлбөрт “Туул, Сэлбэ, Дунд голын урсцыг нэмэгдүүлж, эргийн дагуу иргэд, олон нийтийн эрүүл мэнд, соёл, амралтын тохилог орчныг бүрдүүлнэ” гэсэн зорилтыг дэвшүүлсэн. Энэ хүрээнд Нийслэлийн Засаг даргын 2020 оны А/406 дугаар захирамжаар Нийслэлийн ИТХ-ын төлөөлөгч, Агаар, орчны бохирдлын асуудал хариуцсан Засаг даргын орлогч Д.Мөнхжаргалаар ахлуулсан Туул, Сэлбэ, Дунд голын урсцыг нэмэгдүүлж, эргийн дагуу иргэд, олон нийтийн эрүүл мэнд, соёл, амралтын тохилог орчин бүрдүүлэх боломжийг судлах, санал боловсруулах үүрэг бүхий ажлын хэсгийг байгуулан ажиллаж байна. Улаанбаатар хотод иргэд чөлөөт цагаа өнгөрүүлэх эрүүл мэнд, соёл амралтын хүрээлэн цөөн байдаг. Жилээс жилд Туул, Сэлбэ, Дунд голын эргээр агаарт гарч, хүүхдээ салхилуулах иргэдийн тоо нэмэгдэж байна.