Н.Номтойбаяр: УЕП Б.Жаргалсайхан УИХ-д худал мэдээлж, намайг гүтгэн доромжилсон

Н.Номтойбаяр “Сүүлийн өдрүүдэд бие даан нэр дэвших болон телевизийн нэвтрүүлэгт оролцсонтой холбоотойгоор АТГ, Нийслэлийн прокурорын байгууллагад дуудагдах боллоо. Энэ оны нэгдүгээр сарын 13-ны өдөр УЕП Батын Жаргалсайхан миний бүрэн эрхийг түдгэлзүүлэх саналыг УИХ-д өргөн барьсан. Хууль бус үйл ажиллагаа явагдаж байгаа талаар би өмнөх сард нь мэдээлэл хийх үеэрээ чаддаг юм бол АТГ, УЕП миний бүрэн эрхийг түдгэлзүүл гэсэн.

Арванхоёрдугаар сарын 12-ны өдөр хийсэн хэвлэлийн хурлыг хууль зөрчсөн байж болзошгүй хэмээн гомдол гаргасан. Үүний хариуд Нийслэлийн прокуророос 12 сарын 26-нд хууль зөрчөөгүй гэсэн дүгнэлтийг гаргасан. УЕП Б.Жаргалсайхан УИХ-д худал мэдээлсэн, намайг гүтгэн доромжилсон, авлига албан тушаалын давуу байдлаа ашигласан. Хуулийн өмнө бүгд тэгш эрхтэй байх ёстой. Хууль цаазын тэргүүн зөвлөх байна уу, Улсын Ерөнхий прокурор байна уу, УИХ-ын гишүүн, Ерөнхий сайд, Ерөнхийлөгч байна уу хамаагүй. Намайг хэн нэгэн яасан тэнэг үйлдэл хийв ээ, УЕП-ыг нотлох баримтын хамт АТГ-т өгч нүд рүүгээ гараа хийж байна бодох байх. Миний баримталдаг зарчим бол хуулийн өмнө тэгш байх. Намайг худал мэдүүлэг өгсөн, ХНХ-ын сайд байхдаа албан тушаалын байдлаа ашигласан гэж гүтгэж байгаа юм бол би нотлох баримтад үндэслээд УЕП-ыг Авлигатай тэмцэх газар өгч иргэний эрхээ эдэлж байна. Прокурор байлаа гээд хуулиас давуу байж болохгүй. АТГ-ын бичиг хэрэгт гомдлоо өгчихлөө.

Дөрөвдүгээр сарын 20-ны өдөр сайдаар ажиллаж байхдаа гаргасантай яг ижил шийдвэрийг У.Хүрэлсүхийн Засгийн газар 2018, 2019 онд гаргасан. Эдгээр шийдвэрээ буруутай гэж үзэхгүй хэр нь намайг буруутай гээд байна. Энэ гомдлынхоо хариуг авахаар 18 хоног хүлээж байна. Намайг хэлмэгдүүлж яллахдаа надад мэдэгдэхгүйгээр яллачихаад дараа нь мэдэгдэж байсан хүмүүс шүү дээ” гэлээ.