Төрийн банкны захиралуудын авилга буюу зээл бүтээсний “шагнал”

Төрийн банкны захирал сарын 18 сая төгрөгийн цалиндаа ханаж, цадахгүй нэг компаниас 235 сая төгрөг хахуульд авчээ. Тодруулбал, тус банкны гүйцэтгэх захирал Б.Цэндсүрэн, тэргүүн орлогч захирал Д.Ганбаатар нар авилга, албан тушаалын хэргээр ял сонссон. Уг нь Төрийн банкны Ерөнхий захирал Д.Баярсайхан сарын 18 сая, жилийн 216 сая төгрөг, Гүйцэтгэх захирал Б.Цэндсүрэн сарын 15 сая, жилийн 180 сая төгрөг, Тэргүүн орлогч Д.Ганбаатар сарын 12 сая, жилийн 144 сая төгрөгийн цалин авч байлаа. Тэднээс доош 8-10 сая төгрөгийн цалин авдаг 10-аад захирал ажиллаж байлаа.

Албан хэрэгцээндээ LEХUS-570 автомашин хөлөглөдөг тансаг хүмүүс шүү бас. Ингээд ч зогсохгүй авдаг цалин, унадаг машинаасаа гадна Төрийн банкнаас гаргасан зээлийнхээ 5-10 хувийг хахуульд авдаг байжээ. Авлигын хэрэгт холбогдсон Төрийн банкны гүйцэтгэх захирал Б.Цэндсүрэн, тэргүүн орлогч захирал Д.Ганбаатар нарын зарим холбоосыг дурдвал:

Төрийн банкны гүйцэтгэх захирал Б.Цэндсүрэнг “Бичура” компанийн захирал М.Болортуяа таньдаг байжээ. Тиймээс түүгээр дамжуулан 5 тэрбумын зээл хүссэн байна. Зээлийн материалд хийсэн үнэлгээгээр эрсдэл өндөр гэж гарчээ. Гэвч 2017.09.12-ны зээлийн хорооны хуралд Д.Цэндсүрэн оролцож, “Бичура” компанид 4.7 тэрбум төгрөгийн зээл олгосон байна. Харин дараа нь зээл гарангуут: “Төрийн банкнаас зээл гаргахад зээлийн хорооны гишүүдэд нийт дүнгийн 10 хувийг өгөх ёстой. Чи зээлийн дүнгийн 5 хувийг өг” гэсний дагуу Б.Цэндсүрэнд 235 сая төгрөг хахууль болгон өгчээ.

Үүгээр зогсохгүй 2018 оны хоёрдугаар сард Төрийн банкны гүйцэтгэх захирал Б.Цэндсүрэн нь Төрийн банкны тэргүүн орлогч захирал Д.Ганбаатарын хамт тус компаний тавилгын дэлгүүр дээр очиж, 22 сая төгрөгийн буйдангийн сет тавилга авсан байна. Эдгээр захирлууд 2017.06.23-нд БНХАУ-ын “Шинжиан Шинфа” компанид хууль зөрчин 20 тэрбум төгрөгийн зээл олгоход оролцжээ. Тэдэнд нийтийн албан тушаалтан албан үүргээ урвуулан ашигласан гэсэн үндэслэлээр шүүхээс ял оноожээ. Ингэхдээ Төрийн банкны гүйцэтгэх захирал Б.Цэндсүрэнгийн нийтийн албанд томилогдох эрхийг 5 жилээр хасч, 3.6 жилээр хорих ял, Д.Ганбаатарыг нийтийн албанд томилогдох эрхийг 4 жилээр хасч, 10 сая төгрөгөөр торгох ял оногдуулжээ.

Төрийн албан хаагчдын цалин, хангамжийг нэмэхийн хирээр авлига буурна гэж тооцсон ч энэ нь эсрэгээрээ хэрэгжсэн гэсэн үг. Цалин хангамж нэмэгдэхийн хирээр авлигын хэмжээ улам нэмэгдсээр. Шүүгчдийн цалин нэмээд авилгал нь дийлдэхээ больсон. Яг түүн шиг төрийн хамгийн өндөр цалинтай Төрийн банкны захирлуудын нэг компаниас авах авилгын хэмжээ авсан зээлийн дүнгийн 10 хувиар гэхээр… Цаана нь илрээгүй хичнээн авлига байгаа бол??

Эх сурвалж: Erennews.mn