ХЭҮК: Шалгалтаар явж байх үед хөлийг дөнгөлөх, гарыг гавлах сандал байсныг илрүүлсэн

ХЭҮК-ын дарга Ж.Бямбадорж “Би та бүхэнд 2017 оны 10 дугаар сарыг эргэн санаач гэж хүсье. Тухайн үед Хүний эрхийн үндэсний комисс хүүхдийн эрхийн талаар илтгэлүүдээ гуравдугаар сарын 30-ны дотор УИХ-д мэдүүлсэн боловч УИХ үүнийг хэлэлцээгүй. Үүний дараагаар хүүхдийн төлбөрийн асуудлаас болоод нийгмийн сүлжээнд шуугиан үүсэхэд манай илтгэл үнэн болж таарсан. Үүнээс хойш хүүхдийн эрхийн асуудал ямар амжилтанд хүрсэн гэдгийг та бүхэн мэдэж байгаа.

2014 оны нэгдүгээр сарын 24-нд УИХ-ын есөн гишүүн санаачилж, Улсын ерөнхий прокурорын дэргэд байсан мөрдөн байцаах албыг татан буулгасан. Энэ үеэс эхлэн Монголд эрүүдэн шүүх асуудал газар авч эхэлсэн.

Манай комисс УИХ-д нийтдээ 17 илтгэл бичсэн. Үүний 13-т нь эрүүдэн шүүлтийн асуудлын талаар оруулсан. Харамсалтай нь энэ талаар дорвитой арга хэмжээ аваагүй. Мөрдөн байцаах албыг татан буулгачихаад янз бүрийн үүргийн асуудал оногдуулах гэж оролдсон. УЕПГ-ын дэргэд байсан энэ албыг үнэхээр шударга ажиллаж байсан.

2014 онд Монгол Улс эрүүдэн шүүх, хүний нэр төрд халдахын эсрэг конвенцэд нэгдэн орсон. 5 жил болсон ч энэ конвенцийг хэрэгжүүлээгүй.

С.Зоригийн амийг хөнөөсөн хэргийг шалгахтай холбоотой 2015 оны 7-р сараас эхлээд л эргэлт оруулахгүй байна гэх мэт гомдол ирсэн. Маш нууцын зэрэглэлтэй учир тухайн үед нь гаргаж тавьж болохгүй байлаа. Эрүүдэн шүүх гэдэг бол гэмт хэрэг. Бид энэ хэргийг шалгахтай холбоотой гарсан зөрчлүүдийн талаар холбогдох байгууллагад нь албан бичиг хүргүүлдэг.

2012 оноос эхлэн нийслэлийн 9 дүүрэг, 12 аймгийн төвд шүүх өрөөг мэдүүлэг авах өрөөг дуу, дүрсний камертай болгосон. Мэдүүлэг өгч буй хүний нүүр царай болон үйл хөдлөлийг бүрэн оруулах зорилгоор нэмэлт төхөөрөмж суурилуулна гэж заасан. Харамсалтай нь энэ шаардлага орон нутагт хэрэгжихгүй байна. Тэнд эрүүдэн шүүх ажиллагаа явагдаж байна гэсэн үг” гэлээ.

ХЭҮК-ийн гишүүн П.Оюунчимэг: Бид хөдөө орон нутагт шалгалтаар явж байхдаа мэдүүлэг авах үед хөлийг дөнгөлөх, гарыг гавлах сандал байсныг илрүүлсэн. Тухайн үед Х.Тэмүүжин сайдад эрүүдэн шүүх сандлыг хэрэглэхгүй байх, энэ сандлыг хэрэглэвэл Олон улсын конвенц зөрчиж байгаа тухай албан бичиг илгээсэн. Ингэснээр хөдөө орон нутагт тараасан бүх сандлууд татагдсан” гэлээ.