Монгол улсын иргэдээс 26 тэрбум төгрөгийг залилан мэхэлж авчээ

Казакстан улсын нэрийг барьж Монгол улсын нутаг дэвсгэрт пирамид тогтолцоотой Жи-Тайм гэх нэртэй сүлжээг дэлгэрүүлж, улмаар 11739 хүнийг хохирогч болгосон. Уг сүлжээний бизнес нэрэн дор залилангийн гэмт хэрэг үйлдсэн Ж.Марат нь мөрдөн байцаалтын явцад хил гаран оргон зайлсан байдаг.

Одоогийн байдлаар түүнийг Цагдаагийн ерөнхий газрын Мөрдөн шалгах албанаас олон улсын Интерполын сүлжээгээр эрэн сурважлах ажиллагааг үргэлжлүүлж байна.

Ж.Марат нь эхнэрийнхээ хамтаар өнгөрсөн оны хоёрдугаар сарын 12-нд “Чингис хаан” Олон улсын нисэх онгоцны буудлаас хил гарах гэж байхад нь Эрүүгийн цагдаагийн Эдийн засагтай тэмцэх албаны мөрдөгчид баривчлан саатуулсан байдаг. Учир нь Монгол улсын нутаг дэвсгэрт сүлжээний бизнес эрхэлж олон мянган иргэнийг элсүүлж, мөнгө угаах аргаар дансандаа зургаан тэрбум төгрөг хуримтлуулсан гэсэн үндэслэлээр эрүүгийн хэрэг үүсгэн шалгаж эхэлсэн. Түүнд болон түүний эхнэрт хилийн хориг тавьсан байсан ч эхнэр нь хилээр гарсан тул шалгаж чадаагүй байдаг.

Ж.Маратын хэргийг мөрдөн байцаалтын ажиллагаа өнгөрөгч оны арванхоёрдугаар сард дуусч, улмаар яллах дүгнэлт үйлдлүүлэх саналтайгаар хэргийг прокурорт шилжүүлэхээр болсон байсан хэмээн албаны эх сурвалж мэдээлж байв. Гэтэл шүүхээс түүнийг батлан даалтад гаргаж, мөрдөн шалгах ажиллагааны явцад оргон зайлсан байгаа юм. Хууль хяналтын байгууллагынхан эрх зүйн харилцан туслалцах гэрээтэй орнуудтай харилцан мэдээлэл солилцож ажиллаж байна гэв. Ж.Марат нь монгол улсад хэрэгжүүлсэн сүлжээний бизнес гэх нэртэй залилан мэхлэх аргаар 11734 иргэнээс 26 тэрбум төгрөг авчээ.

Цагдаагийн байгууллагаас Жи-Тайм сүлжээний 6,9 сая төгрөг, 400 сая төгрөгийн өртөгтэй автомашин, гурван тэрбум төгрөгийн үнэ бүхий бараа бүтээгдэхүүнийг битүүмжлээд байгаа аж.

Гэхдээ эл битүүмжилсэн хөрөнгө нь хохирсон иргэдийн хохирлын хэмжээний ердөө 30%-тай тэмцэх хэмжээний хөрөнгө юм. Битүүмжилсэн дээрх хөрөнгийг мөрдөн байцаалтын шатанд нөхөн төлүүлэх талаар Нийслэлийн прокурорын газар, Улсын ерөнхий прокурорын газар, дүүрэг дэх шүүх болон Улсын дээд шүүхэд саналаа хүргүүлээд ажиллаж байна хэмээн мэдээлсэн.

Мөрдөн байцаах албанаас мэдээлснээр гэмт хэргийн сэжигтэн оргон зайлсан, шүүхээр түүнийг эцэслэн гэм бурууг нь тогтоогоогүй байхад хэрхэн, яаж хохирол нөхөн төлүүлэх вэ гэдэг дээр хүндрэл үүсээд байгаа гэв. Харин өнөөдрийг хүртэл Ж.Марат ор сураггүй хэвээр байгаа талаар албаны эх сурвалж мэдээлж байна.