Агаарын бохирдлын асуудлаар Ерөнхий хяналтын сонсгол хийж байна

Монгол Улсын Ерөнхийлөгч Х.Баттулга өнгөрсөн арванхоёрдугаар сарын 10-нд  Ерөнхий хяналтын сонсгол явуулах тухай албан бичгийг УИХ-ын дарга М.Энхболдод хүргүүлсэн. Нийтийн сонсголын тухай хуулийн наймдугаар зүйлд Монгол Улсын Ерөнхийлөгч хүсэлт гаргасан тохиолдолд Ерөнхий хяналтын сонсголыг заавал явуулахаар заасан байдаг. Үүний дагуу УИХ-ын Байгаль орчин, хүнс хөдөө аж ахуйн байнгын хорооноос Ерөнхий хяналтын сонсгол зохион байгуулж байна. Сонсголд агаарын бохирдлыг бууруулах чиглэлээр ажиллаж буй бүх төвшний удирдах албан тушаалтнууд оролцож байгаа юм. Тухайлбал, Ерөнхийлөгчийн зөвлөх Г.Уянга Ерөнхий хяналтын сонсголд оролцож Ерөнхийлөгчийн байр суурийг танилцууллаа. Энэ удаагийн Ерөнхий хяналтын сонсгол нь 2015 онд батлагдсан Нийтийн сонсголын тухай хуулийн дагуу зохион байгуулах анхны Ерөнхий хяналтын сонсгол болох юм.