Зуун айлын барилгын материалын захыг нүүлгэх асуудлыг хэлэлцжээ

Өнгөрсөн хугацаанд энэхүү ажлыг зохион байгуулах талаар санал, дүгнэлт судалгаа, төлөвлөгөө боловсруулах ажлын хэсгээс 12 удаагийн хуралдаан, 3 удаагийн ажил байдалтай танилцах уулзалт зохион байгуулжээ. Мөн 100 айлын барилгын материалын худалдаа эрхлэгчдийн төлөөлөлтэй 5 удаагийн уулзалт хийж санал солилцсон байна.Үүний үр дүнд нийслэлийн төв цэгт орших барилгын материалын худалдааны зах, төвийн үйл ажиллагааг холбогдох хууль, тогтоомжийн хүрээнд цэгцлэх, стандарт шаардлагыг мөрдүүлж ажиллах, гар дээрээс болон гадуурх худалдааны цэгүүдийн үйл ажиллагааг зогсоох, агаар, хөрсний бохирдол үүсгэж байгаа үйлдвэрүүдийг нүүлгэн шилжүүлэх зайлшгүй шаардлагатай гэсэн дүгнэлт гарчээ.

Хууль тогтоомж зөрчин үйл ажиллагаагаа явуулж байгаа үйлдвэрүүдийг шилжүүлэн байршуулах талаар Сонгинохайрхан, Баянзүрх, Сүхбаатар, Чингэлтэй, Налайх дүүргүүдийн Засаг дарга нарыг ажлын хэсгийн хуралдаанд урьж оролцуулан санал авсан байна. Энэ үеэр Налайх дүүргийн Засаг даргаас бусад дүүргийн Засаг дарга нар хүлээн авах газар байхгүй тухайгаа илэрхийлжээ. Тиймээс Налайхын барилгын материал үйлдвэр техологийн паркаас өөр газар барилгын материалын үйлдвэрүүдийг хүлээн авах боломжгүй болоод байгаа юм байна.
Иймд барилгын материалын үйлдвэрүүдийг нүүлгэх шилжүүлэх Налайхын Барилгын материалын үйлдвэрлэл технологийн паркийн дэд бүтцийг сайжруулах ажлын хүрээнд Налайх-Чойрын чиглэлийн төв замтай холбох, 100 айлын уулзвараас 32-ын тойрог хүртэл автозамын зам талбайг шинээр засаж сайжруулах, өргөтгөлийн ажлыг хийх мөнгөн хөрөнгийг шийдвэрлүүлэх хүсэлтэй байгаагаа НИТХ-ын Тэргүүлэгчдэд танилцуулжээ. НИТХ-ын Тэргүүлэгчид энэ асуудлыг дэмжиж ирэх сарын 3-ны дотор Нийслэлийн Засаг дарга бөгөөд Улаанбаатар хотын захирагч С.Батболдыг тус мөнгөн хөрөнгийг хэрхэн шийдвэрлэх тухай саналаа танилцуулахыг даалгасан байна.