Хөл бөмбөгийн ханхүү Роналдугийн Франц Футболд өгсөн хамгийн сүүлийн үеийн ярилцлагыг хүргэж байна. Тэрбээр сэтгүүлчтэй ярилцаж байхдаа “700 гоол бол хүн болгоны хөнгөхөн хүрчих тоо биш. Англи, Испани, Итали би хаана ч дасан зохицож чадна. Би өдийгөөс төдий хүртэл төгс төгөлдөр тоглогч байхын төлөө л тэмүүлж ирсэн” хэмээн онцолсон юм. Ингээд дэлхийн сая сая шүтэн бишрэгчдийнхээ хайр, харцанд мөнхөд ил амьдардаг ч хэзээ ч нэг л зангаараа үргэлж инээмсэглэн алхдаг хөл бөмбөгийн ханхүүгийн ярилцлагыг хүргэе.

-Ингэхэд, та оруулсан гоол болгоноо санаж чадах уу?

-Үгүй, яалаа гэж. Дэндүү олон шүү дээ. Тиймэээс шууд цээжээр хэлэх маш хэцүү. Харин тоглолтын бичлэгүүдээ үзвэл бүгдийг нь санана.

– Фулхэм…?

– 2007 оны хоёрдугаар сар, гэртээ тэнцэж яваад 88 дахь минутад гоолдож 2-1 ээр хожиж байсан тоглолт. Эхэндээ бол би бөмбөгөөр шоу үзүүлээд л дрибл хийх дуртай байсан. Түүний дараа хөлбөмбөг зөвхөн талбай дээр үзүүлж байгаа гоёмсог тоглолт, олон дрибл биш. Хөлбөмбөг бол тоо, рекорд, цом юм байна гэдгийг ойлгосон. Хожмоор байвал гоолдох л хэрэгтэй. Надад авьяас байсан Сир Алексаас ч их юм сурсан. Талбай дээр уран дамжуулалт өгөх, дрибл хийхээс гадна надад гоол оруулах потенциал байсан. Тэр талаа илүү хөгжүүлсэн. Тэнэг л биш бол Манчестерт Гиггс, Сколс, Рио Фэрдинанд гэх шилдгүүдээс сурахгүй гээд яах юм. Тэднээс л бүгдийг сурсан.

– Хэдхэн сарын дараа 35 нас хүрэх нь. Цаг хугацааны хүндийг мэдэрч байна уу?

-Тэгэлгүй яахав. Хүн дунджаар 82.5 жил амьдардаг ч зарим нь 65 наснаас хойш юм санахаа болж, байнга эм ууж, хүүхдийнхээ нэрийг мартаж эхэлдэг. Урт удаан амьдрах боломжтой ч амьдралын чанар залуугийнх шигээ байхаа больдог. Нас нэмэгдсэн ч би бие махбод, оюун санааны хувьд аль болохоор залуу байхыг л хичээж байна. Миний насан дээр Ювентусд ийм амжилт үзүүлж тоглох амархан биш. Би нойр, хоол, дасгал хөдөлгөөнөөр биеэ ингэж авч явдаг. Миний амьдралын 70% зөвхөн хөлбөмбөгт л зориулагддаг. Эргэн тойронд минь байнга боловсролтой, хөдөлмөрч хүмүүс байсан болохоор би өнөөдөр өөртөө байгаа бүхэндээ хүрсэн. Өдөр бүхэн би тэднээс суралцдаг. Би уулзсан хүн болгоноосоо ямар нэг юм сурахыг хичээдэг. 4,5 жилийн өмнө аав болсоныхоо дараа би залуу байхдаа сургуулийн боловсролыг үл тоож сургуульд сурах ёстой байсан зүйлсээ сураагүй минь том алдаа байсныг ойлгосон. Одоо бол хэзээ хэзээнээсээ илүү сурч боловсрохыг хүсдэг болсон. Аль болох их унших, шилмэл баримтат кинонуудыг үзэж бясалгал хийж иог ч сонирхдог болж байна.

-Бясалгал танд яаж нөлөөлж байна?

-Тайвшруулж, их амар амгаланг мэдрүүлдэг. Бараг өдөр бүр бясалгаж одоо бол ялангуяа зөв амьсгал дээр төвлөрч байна.

-Бид бүхэн таныг яаж дурсаасай гэж хүсч байна?

-Гайхалтай, шилдэг байсан гэдгээрээ дурсагдах нь мэдээж сайхан. Өнөөдөр би хүмүүсийн миний тухай ярьж буй бүхнийг сонсдог. Гэхдээ хөлбөмбөгийн дараа би энэ бүхнээс бүр мөсөн холбоогоо тасална.

-Үнэхээр үү?

-Тэгэлгүй яахав. Энэ каррьерын төлөө би зарим нэг золиосыг гаргасаар 15 жил өнгөрлөө. Хөлбөмбөгийн дараа хүрсэн бүхнээрээ бахархах нь ойлгомжтой. Гэр бүл, найз нөхөдтэйгөө хамт байж хүүхдүүдийнхээ өсч томрох, сурч боловсрохыг харна. Одоо цагаа таашааж амьдарна. Гэхдээ яг одоо хөлбөмбөгөөс зодог тайлах болоогүй. Надад тамирчны хувьд хүрэх, хийх зүйл олон байна.

 

Орчуулсан Б.Хонгорзул

 

 

Сэтгэгдэл үлдээх

Leave a Reply

Your email address will not be published.

Confirm that you are not a bot - select a man with raised hand:

This site uses Akismet to reduce spam. Learn how your comment data is processed.