Насанд хүрээгүй охидтой архидан самуурч, зам тээврийн осол гаргаж насанд хүрээгүй хүүхдийн аминд хүрсэн хэрэгт Булган аймгийн Онцгой байдлын алба хаагчид холбогджээ. Уг хэрэг энэ оны долдугаар сарын 30-нд Булган аймагт гарсан байдаг. Булган аймгийн Ерөнхий боловсролын сургуулийн 11 дүгээр ангийн охидтой Онцгой байдлын хэлтсийн алба хаагч Э,Л нар долдугаар сарын 30-нд уулзаж, шоудахаар болсон байна.
Уулзаад л согтууруулах ундаа хэрэглэсэн тэд архи хэтрүүлсэн хэрэглэсэнээ ч тоохгүй машин барин замын хөдөлгөөнд оролцож, замдаа 15 настай Н-тэй тааран машиндаа суулгаад аймгаас гарч шоудахаар хөдөлсөн аж. Архи хэтрүүлсэн хэрэглэсэн тэд хурд хэтрүүлэн давхиж зам тээврийн осол гаргаснаар 15 настай Н газар дээрээ нас барж, бусад нь хүнд гэмтсэн байна.
Тухайн үед жолоо барьж явсан Онцгой байдлын алба хаагч Л-ийн биеийн байдал нь харьцангуй гайгүй байгаа учир гадуур эмчилгээ хийлгэж байгаа бөгөөд гэмтсэн алба хаагчид болон охидыг Гэмтэл согог судлалын төвд авчран эмчилж байгаа аж.
Харин онц байдал зарласан онцгой байдал болон хүчний байгууллагууд өндөржүүлсэн бэлэн байдалд ажиллаж байсан үед албаны нэр хүндэд сөргөөр нөлөөлөх асуудал үүсээд байгаа учир уг хэргийг олон нийтэд хүрэхээс нь өмнө шуурхай шийдвэрлэхийг шат шатандаа үүрэгдэн нууцалсан ч ийнхүү ил болж байна.
Орон даяар онц байдал зарласан энэ үед Онцгой байдлын албанд ажилладаг алба хаагчид насанд хүрээгүй охидтой архидан согтуурсан. Архидан согтуурсан үедээ зам тээврийн осол гаргаж, насанд хүрээгүй хүүхдийн амийг хөнөөсөн хэрэгт онцгой байдлын алба хаагчид оролцсон нь маш том асуудал төдийгүй уг хэргийг нуун дарагдуулах гэж ихэд нууцалж, бүр цагдаагийн байгууллагын жижүүрийн мэдээнээс ч дуудлагын мэдээллийг нь устгуулсан нь хэрээс хэтэрсэн асуудал гэдгийг сэтгүүлчийн зүгээс сануулах нь илүүц биз ээ…
Сэтгүүлч Х.Сансар