СЕХ: Саналын хуудсыг 100 хувь гараар тоолж, баталгаажуулна

Монгол Улсын Их Хурлын 2024 оны ээлжит сонгуулийн санал авах ажиллагаа дууссаны дараа бүх хэсэгт саналын хуудсыг 100 хувь гараар (хяналтын тооллого) нэг бүрчлэн тоолно. Тодруулбал, санал тоолох төхөөрөмжөөс гарсан дүнг гар тооллогоор баталгаажуулах юм.

Саналын хуудсыг гараар тоолох үйл ажиллагаа ажиглагч, хэвлэл мэдээллийн байгууллага, сонгогчдын төлөөлөлд бүрэн нээлттэй.

Иргэний үнэмлэхээ хаясан, алга болгосон бол И-Монголиагаа утсаараа үзүүлээд л саналаа өгч болно. Хамгийн гол нь таны хурууны хээ таарч байх ёстой юм байна гэдгийг албаныхан мэдээллээ.

Саналын хуудсыг гараар тоолох ажиллагааг санал авах байранд болон зөөврийн битүүмжилсэн саналын хайрцгаар санал өгсөн сонгогчийн тоо, саналын хуудасны зарцуулалтын тооцоог ажиглагч, оролцогчдод мэдээлсний дараа нэн даруй эхлүүлж, завсаргүйгээр явуулна. Ингэхдээ саналын хайрцгаас саналын хуудсыг нэг, нэгээр гаргаж, саналын хуудаст хийсэн тэмдэглэгээг ажиглагчдад ил тод харуулж, нэр дэвшигч, нам эвсэл бүрийн авсан санал бүрийг уншиж танилцуулна.

Өмнөх сонгуулиудаар сонгогдсон хэсэгт хяналтын тооллого хийдэг байсан бөгөөд санал тоолох төхөөрөмж, гар тооллогын дүн зөрсөн удаагүй гэдгийг Сонгуулийн ерөнхий хорооноос мэдээллээ.

СЕХУИХ-ЫН СОНГУУЛЬ-2024