“Монгол тээврийн ирээдүй”, “Өмнөговь аймгийн авто тээвэрчдийн нэгдсэн холбоо” ТББ болон “Монгол тээвэр нэгдэл” ХХК хамтран нүүрсний тээврийн С зөвшөөрлийн талаар Монгол ньюс мэдээллийн төвд хэвлэлийн хурал хийлээ.
“Монгол Тээвэр Нэгдэл” ХХК-ийн ерөнхийлөгч С.Ганболд “Гашуунсухайт боомтод нийт 7,000 гаруй тээврийн хэрэгсэл Монгол Улсын нүүрсний тээврийн үйл ажиллагааг зохицуулан явж байгаа. Үүнээс 10 хүрэхгүй хувийг Монголын үндэсний тээврийн компаниуд гүйцэтгэж байгаа юм. Одоогийн байдлаар хилээр 300 гаруй машин гарч, үйл ажиллагаа сайн явж байна. Энэ нь Ковидын үеэр хяналт дэглэмийн байдалд орчихсон байхад Шадар сайд, Сангийн Сайд, Зам, тээврийн хөгжлийн сайдын хамтарсан 2022 оны тушаалаар уг боомтод тээвэрлэлтийн үйл ажиллагааг зохицуулах журам баталж, бөмбөлөг гэдэг юмыг үүсгэсэн нь тээвэрлэлтийг зохион байгуулалтад амжилттай оруулсантай холбоотой.
2-3 жилийн өмнө Цагаан хад боомтод 100 гаруй километр дараалал үүсчихсэн, хэрүүл маргаантай байдаг байсныг та бүхэн мэдэж байгаа. Энэ байдал өөрчлөгдсөн. Тухайлбал ААН-үүд дүрэм журмын дагуу өөрийн кэмп, халуун усны газар, гал тогоо, эмнэлэгтэй болсон. Цаашид улам сайжруулна.
2022 оны дөрөвдүгээр сарын 7-нд Хууль зүй, Дотоод Хэргийн сайд улс хоорондын байнгын ачаа тээвэрлэх С зөвшөөрлийг уурхайнууд болон борлуулалттай уялдуулж нүүрс худалдан авагч талын саналын дагуу тээвэрлэгч байгууллагад олгоно гэж мэдэгдсэн. Үүний дагуу Автотээврийн нэмэлт хуулийн төсөл боловсруулагдсан байна. Энэ талаар санал бодлоо илэрхийлэх гэж энд цугласан.
Монгол Улсад нийт нүүрсний тээврийн 10 хүрэхгүй хувийг үндэсний компаниуд эзэлж байгаа. Хэрэв С зөвшөөрлийг худалдан авагч талдаа хариуцуулаад өгчихвөл эдгээр тээврийн компаниуд хүнд байдалд орохоос гадна ирээдүйд Монголд тээврийн компани байх уу үгүй юу гэдэг асуудалтай тулгарна” гэв.
Өмнөговь аймгийн Авто тээвэрчдийн нэгдсэн холбооны гүйцэтгэх захирал Адъяасүрэн “Автотээврийн Үндэсний Төв С буюу олон улсад тээвэр хийх зөвшөөрлийг олгодог. Үүнийг тойрсон маргаан, авлига, хээл хахуулийн асуудал үүсдэг. Төрийн бус байгууллагууд болон тээврийн аж ахуйн нэгжүүд олон удаа Засгийн газарт энэ авлига хээл хахуулийн асуудлыг болиулах, тээврийн ААН-үүдэд ижил тэгш эрх олгох саналыг тавьж ирсэн.
Гэвч харамсалтай нь Засгийн газар уг асуудлыг хялбархан буюу хуульд нэгхэн заалт оруулж өөрчлөхөөр өргөн барьжээ. Уг хуулийн төсөлд тээврийн салбар бус Сангийн яам, Уул уурхай, Хүнд үйлдвэрийн яам, уурхайнууд С бичгийг худалдан авагч буюу Хятадын талын ААН-ийн саналыг үндэслэж олгоно гэсэн байна. Тээврийн салбараа үгүй болгох хэмжээний хуулийн төслийг санаачлан өргөн барьж буйд тээврийн ААН-үүд эмзэглэж байна.
300 гаруй тээврийн компани дотор 30 хүрэхгүй монгол компани татвараа төлөөд, ажилчдаа цалинжуулаад, баялаг бүтээгээд тодорхой хэмжээний үүрэг гүйцэтгээд явж байна.
Хуулийн төсөлд зааснаар Монголын тээврийн яамны хийх ёстой ажлыг худалдан авагч болон уурхайнууд хийх гэж байгаа нь үндэсний аюулгүй байдлын асуудал болчихлоо сайд нараа. Засгийн газар энэ асуудлаар нээлттэй хэлэлцүүлэг хийж, тээвэрчид болон бизнес эрхлэгчдийн үгийг сонсож хуульд өөрчлөлт оруулах биш дүрэм журмаа сайжруулах тухай ярихыг шаардаж байна” хэмээн ярилаа.
