​Сан-Францискогийн их сургуулийн Менежментийн сургуулийн захирлаар монгол хүн томилогджээ

АНУ-ын Сан Францискогийн их сургуулийн Менежментийн сургуулийн захирлаар эрдэмтэн, доктор Эрхэмжамцийн Отгонцэцэгийг томилжээ.

Одоогоор Сан Францискогийн их сургуулийн Менежментийн сургуулийн захирлаар Дин Чарльз Т. Мозес ажиллаж байгаа бөгөөд түүний бүрэн эрхийн хугацаа энэ оны долдугаар сарын 1-нд дуусч, тус албыг доктор Э.Отгонцэцэг үргэлжлүүлэхээр болж байгаа аж.

Доктор Э.Отгонцэцэг нь АНУ-ын Бентли их сургуулийн профессор, Бизнес, стратеги хариуцсан дэд захирлаар ажилладаг бөгөөд банк санхүү, байгууллагын санхүү, эрсдэлийн удирдлага ба даатгал, тогтвортой хөрөнгө оруулалт, компанийн нийгмийн хариуцлагын чиглэлээр судалгаа шинжилгээний ажил хийдэг эрдэмтэн юм. Тэрээр дэлхийн өнцөг булан бүрт бакалавр, MBA хөтөлбөрийн сургалтад хэрэглэгдэж буй санхүүгийн хоёр төрлийн сурах бичгийн хамтран зохиогч, түүнчлэн нэр хүндтэй Нийгмийн шинжлэх ухааны судалгааны сүлжээ болох SSRN-ээс түүний судалгааны бүтээл татагдсан тоогоороо топ 10 хувьд багтдаг юм.

Мөн Э.Отгонцэцэг нь одоогоор Үндэсний Шинжлэх Ухааны Сангийн 2.4 сая ам.долларын грантын тусламжтайгаар бакалаврын тогтвортой байдлын боловсролд STEM болон бизнесийн сургалтын хөтөлбөрийг нэгтгэх чиглэлээр ажиллаж байна.