Тусгай зөвшөөрлийг нь цуцалсан ч Б.Дэлгэрсайхан, Ч.Ундрам нарын компани үйл ажиллагаа явуулсаар байна

УИХ-ын гишүүн Б.Дэлгэрсайхан, Ч.Ундрам нарын шууд хамаарал бүхий компаниуд уул уурхайн лицензийн сонгон шалгаруулалтад оролцохгүйгээр үйл ажиллагаа эрхэлж байгаа гэж “Эм Эм Ар Ай” ХХК-иас мэдээлэл хийлээ.

2013 онд тухайн үеийн Ашигт малтмалын газрын дарга авлигын хэрэг холбогдсоны улмаас УУХҮЯ-наас 106 лицензийг хүчингүй болгож байсан. Тэгвэл тэдгээр тусгай зөвшөөрлийн зарим нь цуцлагдаагүй өнөөг хүтэл, үйл ажиллагаа явуулсаар байгаа. Бүр тодруулбал УИХ-ын гишүүн Б.Дэлгэрсайхан, Ч.Ундрам нарын хамаарал бүхий компаниуд үүнтэй холбоотой талааар мэдээллэв.

Б.Батсайхан “Хэд хэдэн тусгай зөвшөөрөл өнөөг хүртэл цуцлагдаагүй, үйл ажиллагаа явуулсаар байгааг олж мэдлээ. Тухайлбал, 15192 дугаартай тусгай зөвшөөрөл нь УИХ-ын гишүүн Б.Дэлгэрсайханы хамаарал бүхий “Инфинити спэйс” ХХК-ийнх бөгөөд тухайн үед цуцлагдаагүй. Одоо хүртэл төмрийн хүдэр олборлож байна.

Мөн УИХ-ын гишүүн Ч.Ундрамын шууд хамаарал бүхий “Өсөх зоос” ХХК-ийн 15177, 15778 дугаартай тусгай зөвшөөрлийг шүүхийн шийдвэрээр 2009 онд хүчингүй болгосон. Гэтэл энэ компани одоо болтол нүүрс олборлож байна. Жирийн иргэдийн компанийн лицензийг шүүхийн шийдвэрээр цуцалчихдаг. УИХ-ын гишүүд, эрх бүхий хүмүүсийн компанийн лиценз цуцлагдахгүй, үйл ажиллагаа нь үргэлжлээд байдаг байж болохгүй” гэв.