Л.Оюун-Эрдэнэ: ЕТГ-ын дарга асан З.Энхболд мэдэн будилж байна

Ерөнхийлөгчийн Тамгын газрын дарга асан, АН-ын даргын ахлах зөвлөх З.Энхболд Тавантолгойн ордыг МАН-ынхан худалдах гэж буй талаар мэдээлэл хийсэн билээ. Тэгвэл энэ асуудлаар Засгийн газрын Хэрэг эрхлэх газрын дарга Л.Оюун-Эрдэнэ тайлбар өгөв. Тэрээр “Улс төр дөхөж байна. Хүмүүс мэдэн будилдаг болж байна. Мэддэг зүйлээ зориуд мэддэггүй болж мэдэн будилж байна. Өнөөдөр би ҮАБЗ-ийн Ерөнхий нарийн бичгийн дарга А.Гансүхэд ҮАБЗ-ийн 2018 оны 33, 21 дүгээр зөвлөмжийг хуулийн дагуу ил болгох санал өгсөн. Тавантолгой нүүрсний ордын талаар авах зарим арга хэмжээний тухай Засгийн газрын тогтоолыг 2018 оны долдугаар сарын 9-ний өдөр гаргасан. Тогтоолыг ҮАБЗ-ийн 2018 оны 33, 21 дүгээр зөвлөмжийг үндэслэн гаргасан. Үндсэндээ Тавантолгой орд газрыг эдийн засгийн эргэлтэд оруулж, төмөр замын дэд бүтцийн ажлыг явуулахтай холбоотой зөвлөмж гарсан юм. ҮАБЗ-тэй хамгийн ойр ажилладаг хүн нь Ерөнхийлөгчийн Тамгын газрын дарга. Энэ зөвлөмжийг боловсруулах ажилд оролцсон, хуралд нь суусан хүн. ЗГХЭГ бол ҮАБЗ-ийн хуралд тухай бүр оролцдоггүй. Энэ зөвлөмжийг буруу гэж үзсэн юм бол хоёр жилийн хугацаанд засахгүй яасан юм бэ. Зүүнбаянгийн төмөр замд Ерөнхийлөгчийн институц улс төрийн манлайлал үзүүлж, томоохон бүтээн байгуулалтын ажил хийж байгаа. Үүнтэй холбоотой УИХ-ын тогтоол гарсан. Засгийн газар үүнийг хэрэгжүүлээгүй. Үндсэндээ судалгааны түвшинд явж байгаа. Ер нь АН-ын увайгүй улс төр олон дахин давтагдаж байгаа учраас Засгийн газар болгоомжтой хандсан. Тавантолгой ордыг эдийн засгийн эргэлтэд оруулж, олон улсын хөрөнгийн бирж дээр нээлттэй гаргах судалгааны ажил хийж байгаа. Энэ зөв үү гэвэл зөв. Харин улс төрийн байдлаар цааш явахгүй нь тодорхой болж байна. Энэ зөвлөмж ил болсны дараа Засгийн газрын хуралдаан зарлаж, шаардлагатай бол Засгийн газар буюу Ерөнхий сайд татгалзан гарах асуудлыг тогтоно гэсэн үг. Үүнийг дагаад дэд бүтцийн ажлууд зогсох эрсдэл үүсэж болзошгүй.