О.Батнайрамдал: Оюутолгойн хянан шалгах түр хороо 65 мянган хуудас баримт цуглуулсан

УИХ-ын гишүүн О.Батнайрамдал:“УИХ-ын Оюутолгойн бүлэг ордын ашиглалтад Монгол Улсын эрх ашгийг хангуулах, хүртэх өгөөжийг нэмэгдүүлэхтэй холбоотой баримт бичиг, үйл ажиллагаанд хяналт шалгалт хийх түр хороог ахлан ажиллаж байгаа  юм. Сонсгол энэ сарын 8-12-ны өдрүүдэд болох тов гараад байгаа.

УИХ Оюутолгойн асуудал дээр хянан шалгах түр хороог долдугаар сарын 2-нд албан ёсоор байгуулсан. Хянан шалгах түр хороог зургаан сарын хугацаатай байгуулдаг. Түр хороог байгуулагдаад таван сар болсон. Энэ ондоо багтаж буюу хянан шалгах түр хорооны хугацаа дуусахаас өмнө сонсголоо зохион байгуулж, нэгдсэн дүгнэлтээ гаргаж УИХ-д танилцуулж, тогтоол гаргуулснаар  хянан шалгах түр хорооны ажил дуусах учиртай.  Сүүлийн таван сарын хугацаанд шинжээчдийн багийг бүрдүүлж, 65 мянга орчим нотлох баримт цуглуулж авсан. Үүн дээрээ ажиллаж байна.

Сонсгол энэ сарын 8-12-ны хооронд зохион байгуулагдана. Сонсголд 300 орчим гэрч дуудсан.  Манай хянан шалгах түр хороо Онтре компанийн лицензтэй холбоотой мөн зээлийн хүүтэй холбоотой асуудлыг шалгаж байгаа. Энэ хүрээнд 2006-2025 он хүртэл буюу 20 орчим жилийн хугацаанд Оюутолгой төслийн хүрээнд ямар шийдвэрүүд гарч байсан талаар судлаж байна. 

Гэрчүүдийн тухайд төрийн өндөр дээд албан тушаал хашиж байсан хүмүүс бий. Гурван Ерөнхийлөгч, 7 Ерөнхий сайд, 25 Засгийн газрын гишүүн, 40 УИХ-ын гишүүнийг дуудсан. Мөн яамд, төрийн байгууллагуудаас гэрчүүдийг дуудсан. Энэ гэрчүүд нь Оюутолгойн төслийн шийдвэрт оролцсон эсэх тухайн үед ажлын хэсэгт оролцсон хүмүүс байгаа.

Гэрчээр дуудна гэдэг хэн нэгнийг олон нийтийн өмнө гаргаж элдэв янзаар цоллох гэж байна гэж огт ойлгож болохгүй. Энэ 20 жилийн хугацаанд Оюутолгой төсөл дээр ямар арга хэмжээнүүд авсан, ямар шийдвэрүүд гаргаж, тэр нь хэрхэн биелсэн бэ гэдгийг тэр хүмүүс өөрсдийнхөө өнцгөөс тайлбарлах боломжийг олгож байна гэсэн үг.