Бразилд хар тамхины мафийнхантай цагдаа нар тулалджээ

Бразилд хар тамхины мафийнхантай цагдаа нар тулалдсан байна.
Тус оронд Засгийн газар болон хар тамхины бүлэглэлийн хоорондох дайн даамжирч, жараад хүн амиа алдсаны дотор энгийн иргэд, дөрвөн цагдаа байжээ.

Guardian-ы мэдээлснээр Рио-де-Жанейро хотын бүх зам, өргөн чөлөөг хаалтаар хаасан аж. Эл хотын хар тамхины наймааны 70 хүртэлх хувийг хянадаг орон нутгийн дээрэмчид, гэмт хэргийн хамгийн хүчирхэг бүлэглэлүүдийн нэг болох “Улаан баг”-ийн эсрэг цагдаа нар өргөн цар хүрээтэй тэмцсэн байна.

Хотын хойд хэсэгт буун дуу сонсдоод, машинууд шатан, хүмүүс гэрээсээ гарахаас эмээж, бүрэн хэмжээний тулаан өрнөсөн гэнэ. Түүнчлэн картелиуд дүүргүүдээс гарах нүх сүвийг хааж, FPV дрон ашиглаж эхэлжээ. Рио-де-Жанейро хотын амбан захирагч К.Кастро “Цэрэг илгээж туслахаас татгалзсан” хэмээн Ерөнхийлөгч Л.да Силваг буруутгав.