Зэвсэгт хүчний Хуурай замын цэргийн хугацаат цэргийн алба хаагчдын “Мотобуудлага, тагнуул, төрөл мэргэжлийн шилдэг бүлэг, тоот” шалгаруулах тэмцээн эн тэнцүү өрсөлдөөн дунд явагдаж өндөрлөв. Зарим даалгаврын гүйцэтгэл рекордыг шинэчлэхэд ойрхон байж, нэгтгэл, ангиудын хугацаат цэргийн алба хаагчдын бэлтгэл өндөр байгааг нотлон харуулж байлаа. Тэр дундаас галын бэлтгэлийн магазин сумлах нормативыг биелүүлэхдээ хэд хэдэн хугацаат цэргийн алба хаагчид “Онц”-оос дээших дүнг үзүүлж, онжавуудаа гайхшируулав. Галын бэлтгэлийн магазин сумлах нормативыг 30 секундад амжиж гүйцэтгэвэл “Онц” гэж дүгнэдэг бөгөөд Зэвсэгт хүчний 119, 327 дугаар ангийн хугацаат цэргийн алба хаагчид үүнийг 17 болон 22 болгон бууруулж чадсан юм. Зэвсэгт хүчний түүхэнд сумалгааны рекорд 16, зарим тохиолдолд 15 гэгддэг бөгөөд дээрх ангиудын алба хаагчид энэ тоонд ойрхон дөхөж очсон нь зохион байгуулагчдын талархлыг хүлээсэн нь тэр.
Рекорд эвдэх шахсан эздийг танилцуулбал Зэвсэгт хүчний 119 дүгээр ангийн хугацаат цэргийн алба хаагч түрүүч А.Бат-Орших, Зэвсэгт хүчний 327 дугаар ангийн хугацаат цэргийн алба хаагч ахлах байлдагч Э.Энхбаяр нар юм. Түрүүч А.Бат-Орших хугацаат дайчдын дунд сурсан эрдэм мэдлэгээрээ өрсөлддөг ийм тэмцээн байгаа нь сайшаалтай. Цэргийн хэргийн мэдлэг, ур чадвар сорьсон тактикийн даалгаврууд хамгийн сонирхолтой нь байлаа, харин онолын шалгалт жаахан хүнд санагдсан хэмээгээд ангид бэлтгэл сургалт хийж байхад сумалгааг 16 секунд хүртэл барьдаг байсан гэнэ.
Ахлах байлдагч Э.Энхбаярын хувьд 22 секунд гэдэг түүний энгийн норм, ангидаа байхдаа 16-17 секундад гүйцэтгэдэг байсан, олны өмнө жаахан сандарч, 22 болгож нэмэгдүүлчихлээ гэв. Тэрээр хугацаат цэргийн албанаас ахлагч, цаашлаад офицер болох зорилт тавьжээ. Үүний тулд сайн суралцаж, өөрийгөө сайн алба хаагч болох бэлтгэлийг бүрэн хангана хэмээн ярилцлагын төгсгөлд өгүүллээ.
Ахмад Д.БОЛОР
