Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Социалист Вьетнам Улсын Ерөнхийлөгч, Намын Ерөнхий нарийн бичгийн дарга То Лам Монгол Улсад албан ёсоор төрийн айлчлал хийж байна. Айлчлалын хүрээнд өнөөдөр (2024.09.30) Монгол Улсын Хууль зүй, дотоод хэргийн яам болон Бүгд Найрамдах Социалист Вьетнам Улсын Хууль зүйн яам хооронд хамтран ажиллах тухай харилцан ойлголцлын санамж бичигт Монгол Улсыг төлөөлж Хууль зүй, дотоод хэргийн сайд О.Алтангэрэл, Вьетнам Улсыг төлөөлж Хууль зүйн сайд Нгуен Хай Нинь нар гарын үсэг зурлаа.
Ингэснээр хууль тогтоомжийн төсөл боловсруулахад урьдчилсан судалгаа хийх, эрх зүйн мэдээллийн нэгдсэн системийг төгөлдөржүүлэх, нийгэмд үзүүлэх нөлөөлөл, хэрэгжилтийн талаар харилцан туршлага солилцох зэргээр хамтран ажиллахын зэрэгцээ иргэний бүртгэл, хууль зүйн туслалцаа, эрх зүйн сурталчилгааны салбарт хамтарч ажиллах боломж бүрдлээ.
Мөн Кибер аюулгүй байдал, кибер гэмт хэрэгтэй тэмцэх тухай харилцан ойлголцлын санамж бичигт Монгол Улсыг төлөөлж Хууль зүй, дотоод хэргийн сайд О.Алтангэрэл, Бүгд Найрамдах Социалист Вьетнам Улсыг төлөөлж Нийгмийн аюулгүй байдлын дэд сайд Фам Те Дунг нар гарын үсэг зурлаа. Энэ хүрээнд Кибер аюулгүй байдлын тухай олон улсын эрх зүйн дүрэм, журам, стандартыг хөгжүүлэн сайжруулах, кибер халдлагаас урьдчилан сэргийлэх үр дүнтэй аргууд, чухал мэдээллийн дэд бүтцийн хамгаалалт, кибер аюулгүй байдлын хамгаалалтын чиглэлээр мэдээлэл солилцож, харилцан туршлага солилцох юм.
Айлчлалын үеэр Хууль зүй дотоод хэргийн сайд О.Алтангэрэл Бүгд Найрамдах Социалист Вьетнам Улсын Хууль зүйн сайд Нгуен Хай Нинийг хүлээн авч уулзсан бөгөөд Бүгд Найрамдах Социалист Вьетнам Улсын Хууль зүйн сайдтай уулзсандаа баяртай байгаагаа илэрхийлээд, хоёр улсын хооронд хамтран ажиллах тухай харилцан ойлголцлын санамж бичиг байгуулсан нь хамтын ажиллагаанд их хувь нэмэр оруулна гэдэгт итгэл төгс байгаагаа онцоллоо.
Нөгөө талаас Бүгд Найрамдах Социалист Вьетнам Улсын Хууль зүйн сайд Нгуен Хай Нинь Хууль зүй, дотоод хэргийн сайд О.Алтангэрэлтэй биечилж уулзаж байгаадаа баяртай байгаагаа илэрхийлсэн бөгөөд Бүгд Найрамдах Социалист Вьетнам Улсад албан ёсоор айлчлал хийхийг урив.
Тус уулзалтад Хууль зүй, дотоод хэргийн яамны Олон улсын гэрээ, гадаад хамтын ажиллагааны газрын дарга Ч.Нарантуяа нарын төлөөлөл байлцлаа.
