Цаг уурын аюулт үзэгдэл болж, 29 хүн усанд боогджээ

Төв аймгийн Алтанбулаг сум Аргал багийн Модон гүүр гэдэг газар нутагладаг зургаан өрхийн иргэд голын усанд боогдсон тухай дуудлагыг зургадугаар сарын 24-ний өдрийн 06:15 цагт тус аймгийн Онцгой байдлын газар хүлээн авчээ. Онцгой байдлын газрын Гал түймэр унтраах, аврах 24 дүгээр ангийн алба хаагчдыг очиход Туул голын сав газарт нутаглаж байсан есөн өрхийн 29 хүн усанд боогдсон байжээ. Тус мэдээллийг Төв аймгийн Онцгой байдлын ерөнхий газраас тодруулахад “Нийт 13 том хүн, 16 хүүхэд, 9 гэр усанд боогдсон байсныг аврах завь ашиглан аюулгүй газарт гаргасан” гэж мэдээллээ..

Төвийн аймгуудын нутгийн зарим газар, зүүн аймгуудын нутгийн баруун хойд хэсгээр бороо, дуу цахилгаантай аадар бороо орно. Бусад нутгаар бороо орохгүй. Салхи төвийн аймгуудын нутгийн хойд хэсгээр баруун өмнөөс хойш эргэж, борооны өмнө түр зуур ширүүсэх төлөвтэй байна.

Зургадугаар сарын 27-нд баруун аймгуудын нутгийн хойд хэсэг, төвийн аймгуудын ихэнх нутгаар, 28, 29-нд төвийн аймгуудын ихэнх нутаг, баруун, зүүн, говийн аймгуудын нутгийн зарим газраар, зургадугаар сарын 30 болон долдугаар сарын 01-нд нутгийн зүүн хагаст, 02-нд нутгийн зүүн өмнөд хэсгээр дуу цахилгаантай аадар бороо орно. Борооны өмнө салхи түр зуур ширүүсч, ихэнх хугацаанд говь, тал, хэрийн нутгаар секундэд 12-14 метр хүрч ширүүснэ.

Ийм иргэд та бүхнийг ус цаг уурын гаралтай аюулт үзэгдэлээс сэрэмжлүүлж байна.

ОБЕГ