Мал эмнэлгийн ерөнхий газар, Мал эмнэлгийн хүрээлэн болон Сэлэнгэ, Булган, Баянхонгор аймгийн мал эмнэлгийн газрын төлөөлөгчдийн хамт ОХУ-ын Бүгд Найрамдах Буриад Улсад ажиллалаа.
Энэ үеэр БНБУ-ын Хөдөө аж ахуй, хүнсний салбарын 100 жилийн ой, Мал эмнэлгийн салбарын 100 жилийн ойн арга хэмжээнд оролцож Монгол улсын мал эмнэлгийн салбарын өмнөөс баяр хүргэж, мэндчилгээ дэвшүүллээ.
Мөн БНБУ-ын Хөдөө аж ахуй, хүнсний Сайд Дареева Галсан Евгеньеьич, Чирипов Даба-жалсан Шагжиевич Сайд, Мал эмнэлгийн газрын дарга Дармаев Амгалан Дымчикович болон бусад албаны төлөөлөгчидтэй уулзаж мал эмнэлгийн салбарын хамтын ажиллагааг хэрхэн өргөжүүлэх чиглэлээр харилцан хэлэлцэж санал солилцлоо.
Экспортыг дэмжих чиглэлээр мал, амьтны гоц халдварт өвчинтэй тэмцэх, урьдчилан сэргийлэх, бүс нутгийн хамтын ажиллагааг бэхжүүлэх, мал эмнэлгийн салбарын сургалт, оюутан солилцох, мэргэжилтэн харилцан туршлага судлуулах чиглэлээр хамтын ажиллагааг өргөжүүлэхэд анхаарч ажиллахаар боллоо.
Монголын төлөөлөгчид В.Р.Филипповын нэрэмжит Буриад улсын Хөдөө аж ахуйн академийн үйл ажиллагаатай танилцаж, тус Хөдөө аж ахуйн академийн Мал эмнэлгийин сургуульд манай улсаас нийт 8 оюутан малын эмчийн ангид суралцаж байна. Цаашид хоёр орны хооронд оюутан солилцоог нэмэгдүүлэх уламжлалт харилцаагаа сэргээж эрчимжүүлэх тал дээр талууд харилцан тохиролцсон.
Түүнчлэн ОХУ-ын мал эмнэлгийн алба, БНБУ-ын мал эмнэлгийн албаны төлөөлөгчидтэй уулзсан уулзалтын дагуу хоёр улсын хооронд мах, махан бүтээгдэхүүний экспортыг нэмэгдүүлэх чиглэлээр Бурят Мяспром үйлдвэрийн үйл ажиллагаатай танилцаж эхний ээлжинд 3000 тонн мах Монгол улсаас бэлтгэн нийлүүлэхээр боллоо.
