Х.Дэлгэр: Нэг дутагдалтай тал нь малын эмч үзээд эмчилгээ хийсэн үү, эсвэл малчин дураараа хийсэн үү гэх асуудал гардаг

“Бичил биетний тэсвэржилт яагаад дэлхий дахинд аюултай болсон бэ гэхээр тэсвэртэй болсон генүүдээ хүн бие биедээ дамжуулдаг болчихсон. Хэрэв бичил биетний тэсвэржилтийн эсрэг арга хэмжээг авахгүй бол 2050 он гэхэд жилдээ арван сая хүн нас бардаг болно гэх судалгааг эрдэмтэд гаргасан” гэдгийг “Нэг эрүүл мэнд, бичил биетний төсөл”-ийн зохицуулагч хэлж байлаа. 

Улсын мал эмнэлэг ариун цэврийн төв лаборатори Хүнсний эрүүл ахуй үлдэгдлийн шинжилгээний лабораторийн мэргэжилтэн Х.Дэлгэр “Манай лабораторид малын гаралтай хүнсний бүтээгдэхүүнүүдийн аюулгүй үзүүлэлтүүдийг олон улсад хүлээ зөвшөөрөгдсөн аргаар үздэг. Ингэхдээ илрүүлэх, тоон шинжилгээ, баталгаажуулах гэсэн гурван түвшинд шинжилдэг.

Манай улсын онцлог бол бэлчээрийн мал аж ахуйтай тул өдөр тутамдаа эм хэрэглэдэггүй. Зөвхөн өвдсөн малдаа хэрэглэдэг. Гэхдээ нэг дутагдалтай тал нь малын эмч үзээд эмчилгээ хийсэн үү, эсвэл малчин дураараа хийсэн үү гэх асуудал гардаг” гэлээ. 

Зарим тоон мэдээллээс онцолбол: 

• Манай улсын нийт малчдын 85% нь өвчтэй малд дур мэдэн эм өгдөг. 
• Бичил биетний тэсвэржилт нь 2050 он гэхэд дэлхийн дотоодын нийт бүтээгдэхүүнийг 3.8%-аар бууруулна. Бичил биетний тэсвэржилт нь хяналтгүй тархсаар байвал дараагийн 10 жилд жил бүр 3.4 триллион ам.долларын ДНБ-ний хомсдолд оруулна. Мөн 24 сая гаруй хүн амыг туйлын ядууралд хүргэх аюултай гэж тооцжээ. 

Бичил биетний тэсвэржилтийн тархалтыг багасгаж болох хүчин зүйлс:

• Хүн амын нягтаршлыг бууруулах, мөн хог хаягдал, ариутгалын менежментийг сайжруулах.
• Халдвараас урьдчилан сэргийлэлт, хяналтын системийг хүн, малын эрүүл мэнд, мал, аж ахуй, ферм, хүнсний үйлдвэрүүдэд бэхжүүлэх
• Мал, амьтанд бичил биетний эсрэг эмийн эмчилгээг дур мэдэн хэрэглэхгүй байх, зөвхөн малын эмчийн зааврын дагуу хэрэглэх.
• Антибиотикийг хэрэглэх зааварт заасны дагуу тохирсон тунгаар бүрэн гүйцэд хэрэглэх.
• Ундны усны цэвэр байдал, орчны ариутгал халдваргүйжүүлэлт, мөн халдварт өвчнөөс урьдчилан сэргийлэх дархлаажуулалт гэдгийг мэргэжилтнүүд хэлж байна.