“Хүүхдэд дүн тавьж буй нь шударга бус. Суралцах чадварт нь тулгуурласан үнэлгээний тогтолцоонд шилжүүлнэ”

УИХ-ын чуулганы нэгдсэн хуралдаанаар Боловсролын ерөнхий хуулийн төслийг хэлэлцэж байна.

Энэ үеэр Боловсрол, шинжлэх ухааны сайд Л.Энх-Амгалан “Ерөнхий боловсролын сургуулиудын хичээлийн хөтөлбөр цаг үеэсээ хоцорсон байна. Тийм учраас хөтөлбөрийн шинэчлэл хийхээр хуулийн төсөлд тусгасан. Дараагийн асуудал нь багш бэлтгэх тухай юм. Багш бэлтгэх 40 орчим сургууль байсан бол 20 болж цөөрсөн.

Цаашид заавал магадлан итгэмжлэгдсэн хөтөлбөрөөр багш бэлтгэх ёстой гэсэн шаардлагыг тавьж байгаа. Багшийг ажлын байран дээр тасралтгүй хөгжүүлдэг тогтолцоог бий болгоно. Багш өөрийнхөө хэрэгцээ шаардлагад нийцсэн сургалтыг ажлын байран дээрээ үргэлж авдаг болно. Мөн хөдөлмөрийг бодитой үнэлдэг болох юм.

Түүнчлэн үнэлгээний шинэчлэлийн асуудал байгаа. Монгол Улс өнөөдрийг хүртэл үнэлгээний тогтолцоогоо бий болгож чадаагүй. Хүүхдэд дүн тавьж байгаа байдал бол боловсролын салбарын шударга бус, хуурамч тогтолцоо. Хүүхэд бүрийн суралцах чадвар, хурдад тулгуурласан ахиц, дэвшлийн үнэлгээний тогтолцоонд шилжүүлье гэж байгаа. Хүүхдийн, багшийн, сургуулийн гэсэн үнэлгээний тогтолцоонд шилжүүлнэ” гэдгийг хэллээ.

Харин боловсролын салбарын засаглалын тухайд “Сургууль, цэцэрлэгийн удирдлагуудыг улс төрөөс хэт хараат байдлаар томилдог. Энэ асуудлыг мэргэжлийн чадвар дээр нь үндэслэсэн тогтолцоонд шилжүүлэх нь зүйтэй” хэмээв.