Турк улсад чанаргүй барилга барьсан 113 хүнийг баривчилжээ

Өнгөрсөн Даваа гарагт болсон газар хөдлөлтийн улмаас нурсан барилгуудын барилгын ажилтай холбогдуулан 113 хүнийг баривчлах тушаал гарсан талаар Туркийн албаны хүмүүс мэдэгдлээ.

Туркийн цагдаа нар барилгын гүйцэтгэгчдийг оролцуулаад одоогоор 12 хүнийг баривчилсан байна.

Үүний зэрэгцээ Туркийн өмнөд хэсэгт эмх замбараагүй байдал үүсч, зарим газарт аврах ажиллагааг зогсоогоод буй.

Турк, Сирид нас барсан хүний тоо 33 мянга гаруйд хүрчээ.

Олон жилийн турш шинжээчид Туркийн олон шинэ барилгууд авлига, Засгийн газрын бодлогоос болж эрсдэлтэй байгааг анхааруулсаар ирсэн.

Газар хөдлөлтийн үеэр олон мянган байшин барилга нурсан нь хүний буруутай үйл ажиллагаанаас болж байгалийн гамшгийн нөлөө улам дордсон уу гэсэн асуулт гарч ирж байна.

Сонгууль дөхөж байгаа энэ үед 20 жил төр барьсан ерөнхийлөгчийн ирээдүй “бүрхэг” байна.

Газар хөдлөлт болсноос хойш зургаа дахь өдөр байдал улам хурцдаж байна.

Бямба гарагт Хатай мужид нэр нь үл мэдэгдэх бүлэглэлийн хооронд мөргөлдөөн гарсан тул Германы аврагчид болон Австрийн арми эрэн хайх ажиллагааг түр зогсоов. Хүнсний нөөц багасч байгаа тул аюулгүй байдал улам дордох төлөвтэй байна гэж нэг аврагч хэлэв.

Туркийн өмнөд хэсэг болон Сирийн хойд хэсэгт сая сая хүн орон гэргүй болж, агаарын температур шөнө бүр буусаар байна.

НҮБ-аас 800,000 гаруй хүн хангалттай хоолгүй байгааг анхааруулсан бөгөөд газар хөдлөлтийн улмаас амиа алдагсдын эцсийн тоо хоёр дахин нэмэгдэх магадлалтайг тус газар дахь тусламжийн агентлаг анхааруулж байна.

Сирид амь үрэгдэгсдийн тоо одоо 3,500 гаруй болсон ч Баасан гарагаас хойш шинэ тоо гараагүй байна. Ням гарагт Туркт нас барсан хүний тоо 29,000 гаруй болжээ.

Бямба гарагт нурангин доороос аврагдсан хүмүүсийн дунд Туркийн Газиантеп мужийн таван ам бүлтэй гэр бүл, Хатай хотод долоон настай охин 132 цаг нурангин дор байсан байна.

Өнгөрсөн Бямба гарагт Туркийн Кахраманмарас мужид очсон НҮБ-ын тусламжийн албаны дарга газар хөдлөлтийг “энэ бүс нутагт сүүлийн 100 жилд тохиолдсон хамгийн аймшигт үйл явдал” гэж тодорхойлсон байна.

Турк, Арменийг холбосон хилийн боомт сүүлийн 35 жилд анх удаа тусламж үзүүлэхийн тулд өнгөрсөн Бямба гарагт нээгдлээ.

Эх сурвалж: BBC