15 настай охиныг хамаарал бүхий гэр бүлийн этгээд нь хөнөөжээ

Ховд аймагт 15 настай охин үе тэнгийнхээ охидод зодуулж, толгойдоо турбагаар цохиулсны улмаас нас барсан талаар мэдээллийг хүргэж байсан.

Энэ талаар Цагдаагийн байгууллагаас “2023 оны нэгдүгээр сарын 29-ны өдөр Ховд аймгийн Жаргалан сумын бүсийн оношилгоо эмчилгээний төвд толгой дээрээ оёдол тавиулсан 15 настай эмэгтэй эмчлэгдэж байгаад нас барсан мэдээлэл тухайн өдөр цагдаагийн байгууллагад бүртгэгдсэн. ЦЕГ-аас Ховд аймгийн цагдаагийн газартай хамтран мөрдөн шалгах ажиллагааг шуурхай явуулсны үр дүнд хэргийг богино хугацаанд илрүүлэн шалгалтын ажиллагааг явуулж байна.

Мөрдөн шалгах явцад амь хохирогч Ж нь 2023 оны нэгдүгээр сарын 12-ны өдөр толгой тус газраа цохиулж гэмтэн эмнэлгийн тусламж үйлчилгээ авснаар 2023 оны нэгдүгээр сарын 28-ны өдөр эмнэлэгт хэвтэн эмчлүүлж байгаад нас барсан. Энэ хэргийн амь хохирогчийн хамаарал бүхий Ж гэгч нь үйлдсэн болохыг тогтоож, Эрүүгийн хэрэг үүсгэн яллагдагчаар татан таслан сэргийлэх арга хэмжээ авахыг саналыг прокурорын байгууллагад хүргүүлээд байна. Хэвлэлээр гарсан дөрвөн хүүхэд турбагаар цохиж гэмтээсэн гэдэг нь худал мэдээлэл бөгөөд харин яллагдагч Ж нь үйлдсэн гэмт хэргээ нуун дарагдуулах зорилгоор үгсэн тохиролцсон, худал мэдээлэл өгч мөрдөн шалгах ажиллагаанд саад учруулсан нь тогтоогдсон. Шинжээч эмчийн дүгнэлт гараагүй байна” гэлээ.