Эрүүл аюулгүй ажлын байрны төлөөх нийгмийн түншлэлийг хөгжүүлэх зорилт дэвшүүлж буй “Нэн түрүүнд ХАБ-2022” чуулга уулзалт өнөөдөр Эрдэнэт хотноо үйл ажиллагаагаа нээлээ. Энэ удаагийн “Нэн түрүүнд ХАБ-2022” чуулга уулзалт өргөн цар хүрээг хамарч, өөр өөр мэргэжлийн салбарынхныг оролцуулан энэ сарын 14-өөс 28-ны өдрүүдэд Улаанбаатар хотноо салбар болон нэгдсэн хуралдаан хэлбэрээр зохион байгуулснаараа шинэлэг бөгөөд өндөр ач холбогдолтой болсон. Тэгвэл нийслэл хотод болсон бага хурлын үр дүн, шийдвэр, оролцогчдын санал бодлыг нэгтгэж, зөвшилцөн гарц шийдэл гаргахаар зохион байгуулагч, оролцогч талууд ийнхүү Эрдэнэт хотод чуулж байна. Чуулга уулзалтын үйл ажиллагааг нээж, “Эрдэнэт үйлдвэр” ТӨҮГ-ын Ерөнхий захирал Г.Ёндон үг хэлэв. Тэрээр “Эрдэнэт үйлдвэрийн гүйцэтгэх удирдлага нэгдүгээрт үйлдвэрлэлийн аюулгүй байдалд онцгой анхаарах болно гэдгийг цохон тэмдэглэе. Нэн түрүүнд хөдөлмөрийн аюулгүй байдал, гэж зүгээр нэг хэлсэн холбоос үг биш юм. Монгол хүний амь нас, эрүүл мэндийг хамгаалах ухааны түлхүүр үг гэж ойлгодог. Тиймээс миний бие Ерөнхий захирлын ажлаа ХАБ-аас эхэлж байна” гэж хөдөлмөрийн аюулгүй байдал, эрүүл ахуйн асуудлыг эрхэмлэн онцолж буйгаа дурдлаа. Түүнчлэн “Нэн түрүүнд ХАБ-2022” чуулга уулзалтыг хамтран зохион байгуулж, дэмжин ажиллаж байгаа ХНХЯ, ХАБЭА-н Үндэсний хороо, МОШПА Төрийн бус байгууллага, Хөдөлмөр нийгмийн харилцааны дээд сургууль, ШУТИС, Монголын Ажил олгогчдын нэгдсэн холбоо, МҮЭ-ийн холбоо болон зохион байгуулах хорооны нийт хамт олонд талархал илэрхийлж, амжилт хүсэв.
“Нэн түрүүнд ХАБ-2022” чуулга уулзалтад ХНХЯ, МХЕГ, МҮЭ-ийн холбоо, МОШПА төрийн бус байгууллагын төлөөлөл, удирдлага болон баялаг бүтээгч уурхайчид оролцож байна. Нээлтийн ажиллагаанд ХНХ-ын яамны НДБЗГ-ын дарга Б.Батжаргал тус яамны сайдын мэндчилгээг уламжилж, “Нэн түрүүнд ХАБ-2022” бага хурлын зохион байгуулах хорооны дарга Г.Адьяа нэгдсэн хуралдааны танилцуулга, үр дүнг танилцуулав. “Аюулгүй байдалд Манлайлал ба Оролцоо” уриатай тус чуулганд оролцогчид аюулыг мэдээлэх сайн туршлагаас суралцаж, “Дээд удирдлагын манлайлал ба үүрэг амлалт” сэдвээр хэлэлцүүлэг өрнүүлнэ.
