ХҮИС шүүхэд хандахаар боллоо

ХҮИС-ийн сургалт эрхлэх тусгай зөвшөөрлийг Боловсрол Шинжлэх Ухааны сайдын “Сургалт эрхлэх тусгай зөвшөөрөл хүчингүй болгох” А/296 дугаар тушаалаар 2022 оны 8-р сарын 19-нд хүчингүй болгож, татан буулгасан байна.

ХҮИС нь 1924 онд Хоршооны түр сургууль нэртэй байгуулагдаж, Монгол улсын мэргэжлийн боловсролын үндсийг тавьсан түүхэн гавъяатай, анхны гурван сургуулийн нэг юм. Улаанбаатар хотын А зэрэглэлийн бүсэд сургалтын орчин үеийн тоног төхөөрөмжөөр тоноглогдсон хичээлийн 2 байр, оюутны дотуур байртай, мэргэжлийн боловсролоос эхлэн бакалавр, магистр, докторын түвшний сургалт эрхэлдэг, түүхэн хөгжлийн явцдаа боловсролын байгууллагын бүх үе шатыг дамжсан онцлогтой сургууль билээ.

Худалдаа үйлчилгээ, бизнесийн салбарт 45000 гаруй мэргэжилтэнг бэлтгэн гаргасан 99 жилийн баялаг түүхтэй, төрийн өмчийн энэхүү ууган сургуулийг салбарын яам нь “Мэргэжлийн хяналтын байгууллагын дүгнэлтээр стандарт зөрчсөн, сургалт эрхлэх тусгай зөвшөөрлийн нөхцөл шаардлагыг удаа дараа хангаагүй” зарим сургуулиудтай ижилсгэж, сургалт эрхлэх тусгай зөвшөөрлийг хүчингүй болгох тухай тушаалыг гэнэт гаргасан нь хууль тогтоомжийн холбогдох заалтуудыг зөрчсөн үйлдэл гэж үзэж, сургуулийн хамт олон нэр төрөө сэргээж, эрх ашгаа хамгаалуулах зорилгоор шүүхэд хандахаар боллоо.