Биеийн тамирын хичээлд масктай орсон хоёр хүүхдийн нэг нь оройноо нас барсан байна

ЕБС-ийн хоёр хүүхэд биеийн тамирын хичээлдээ масктай гүйсний улмаас ухаан алдаж, тархинд цус харвасан гэх мэдээллийг бид өмнө мэдээллэж байсан. Эргэн сануулахад энэ сарын 16-ны өдөр биеийн тамирын хичээлдээ орж байсан хүүхдүүд ухаан алдсан гэх бөгөөд тэднийг ГССҮТ-ийн сэхээн амьдруулах, эрчимт эмчилгээний тасагт эмчилгээ хийсэн байна.

Улмаар зургаадугаар ангийн хүүхэд нь ЭХЭМҮТ-ийн сэхээний тасагт хоёр хоног хэвтэн эмчлүүлж ухаан орсон хэдий ч амьсгалын дутагдлаас болж цус харвасан. Хүүхдийн биеийн байдал ухаан орсон ч хоол идэж, юм ярьж чадахгүй болсон гэх мэдээлэл байна.

Хэдий биеийн байдал сайжирсан ч хөл дээрээ явж чадахгүй ч байж мэднэ гэдгийг эх сурвалж мэдээлж байна. Тэрбээр маш урт хугацааны эмчилгээ хийлгэх аж.

Харин биеийн тамирын хичээлдээ масктай гүйж ухаан алдан унасан аравдугаар ангийн хүүхдийн хувьд тухайн үедээ ухаан орж биеийн байдал нь хэвийн байсан ч оройноо нас баржээ. Бидэнд өгсөн эх сурвалжийн мэдээллээр дээрх хүүхэд амьсгалын дутагдалд оржээ.