Сүүний урамшууллыг бүтэн жилээр нь олгодог байх санал дэвшүүлжээ

Монгол Улсын сүү, сүүн бүтээгдэхүүн нь стратегийн хүнсэнд тооцогддог. Засгийн газрын шийдвэрээр сүүний зах зээлийг тэлэх, малчдаа дэмжих хэд хэдэн шийдвэр гаргасны нэг нь сүүний урамшуулал юм. Тус урамшууллыг бүтэн жилээр нь олгодог байх саналыг “Сүү“ компанийн захирал М.Болод Монгол Улсын Ерөнхийлөгч У.Хүрэлсүхэд тавьсан талаар ХХААХҮЯ-наас мэдээллээ.

Тэрээр “ХХААХҮЯ-наас 2020 оноос сүүний урамшууллыг малчдад өгч эхэлсэн. Үйлдвэрийн аргаар боловсруулсан сүүний литр тутамд 500 төгрөгийг олгодог. Энэ урамшууллыг зуны улиралд харьцангуй үнэлгээг нь буулгаж, өвлийн улиралд нь хэвээр олгох зэргээр дэмжлэгээ үргэлжлүүлснээр сүү бэлтгэн нийлүүлэгчид сүүгээ хэрэгцээндээ зориулахаас илүү үйлдвэрт тушаах нь нэмэгдэнэ.

Сүүний үйлдвэр 1,800 төгрөгөөр литр сүүг авдаг байсан бол 2,300 төгрөгөөр үнэлж авах боломжтой болно. Тиймээс сүүний урамшууллыг бүтэн жилээр нь олгодог байх санал дэвшүүлж байна” гэжээ.