“Шинэ сэргэлтийн бодлого” Хүнсний ногоо, хүлэмжийн таримлын үрийг 80 хувийн хөнгөлөлттэйгээр олгоно

Монгол Улсын Засгийн газраас дэвшүүлсэн “Шинэ сэргэлтийн бодлого”, Атрын дөрөвдүгээр аяныг ногоочид, тариаланчдаа дэмжих зорилгоор хэрэгжүүлэхээр болсон. Энэ хүрээнд хүнсний ногоонд мөнгөн урамшуулал олгох, өвлийн хүлэмжид цахилгааны хөнгөлөлт үзүүлж буй хугацааг уртасгах, хүнсний ногоо, хүлэмжийн таримлын үрийг 80 хувиар хөнгөлөх зэрэг цогц шийдвэрийг гаргасан. Тэгвэл ирэх сарын 4-нөөс эхлэн хүнсний ногоо, хүлэмжийн таримлын үрийг 80 хувиар хөнгөлж, үрийн захиалга авч эхлэх юм байна. Энэ талаар ХХААХҮЯ-ны Хөрс, ургамал хамгаалал, үр сортын хэлтсийн дарга Д.Есөн-Эрдэнээс тодруулахад “Нийслэл, 21 аймгийн Хүнс, хөдөө аж ахуйн газраар дамжуулан хүнсний ногоо, хүлэмжийн таримлын үрийн захиалга авч эхэлнэ. Дөрөвдүгээр сарын 4 буюу даваа гараг гэхэд захиалга авах ногооны үрийн нэр төрөл үнэ тодорхой болно” гэсэн мэдээллийг өглөө.