Хөл хорио тогтоосон хугацаанд вакцинжуулалтыг хойшлуулснаар иргэдийн дунд хүлээлт үүсээд буй. Өнөөдрийн байдлаар хүн амын 31 хувь буюу 637415 нь вакцины эхний тунд хамрагджээ. Эхний тунгаас хойш 21-56 хоногийн дараа хоёр дахь тунг тариулах заавартай байдаг тул иргэд “Вакцины хоёр дахь тун хойшилж, үр дүнгүй боллоо” хэмээн шүүмжлэх болсон.
Эрүүл мэндийн яам вакцинжуулалтыг энэ сарын 25-наас эхлүүлнэ гэж мэдээлсэн ч хугацааг наашлуулж, өнөөдрөөс дархлаажуулалт эхэллээ.
Тодруулбал, нийслэлд 120, явуулын 40 цэгээр дамжуулан иргэд вакцины нэг, хоёрдугаар тунд хамрагдах нь. Ийнхүү вакцинжуулалтын цэгүүдийг өмнөхөөс гурав дахин нэмэгдүүлснээр өдөрт дунджаар 60 мянган иргэнийг вакцинд хамруулахаар УОК-оос тооцжээ. Гэхдээ хөл хорионы үед вакцины нэгдүгээр тунд эрсдэлт бүлгийн 55-иас дээш насны иргэдийг хамруулах юм.
Өөрөөр хэлбэл, хатуу хөл хорионы үед вакцинжуулалтын хоёрдугаар тунг зохион байгуулах бол нэгдүгээр тунд ахмадууд настнуудыг түлхүү хамруулах нь.
Одоогоор вакцины хоёрдугаар тунд хүн амын 3 хувь буюу 60 мянга гаруй иргэн хамрагджээ. Энэ талаар УОК-ын хэвлэлийн төлөөлөгч Ц.Ганзориг хэлэхдээ “Нийслэлд вакцины эхний тунд хамрагдсан 500 мянга, орон нутагт 140 мянга гаруй хүн байна. Вакцины хоёр дахь тунгаас 180 мянга гаруй хүн хоцорсон гэж үзсэн. Тэдний дунд вакцины 56 хоногоос өмнө давтан тунгаа хийлгэх сонирхолтой хүмүүс ч бий.
Дөрөвдүгээр сарын 10, 11, 12, 13-нд вакцины давтан тунг тариулах ёстой байсан 60-70 мянга орчим хүнийг хамруулна. Маргааш нь буюу 13-наас хойш вакцины давтан тунг тариулах байсан иргэд хамрагдах байдлаар вакцинжуулалтыг эрэмбэ дарааллаар зохион байгуулна. Товчхондоо, вакцины давтан тунд хамрагдах ёстой 28 хоногоос хэтэрсэн хүмүүсээ нэн тэргүүнд вакцинд хамруулна.
Ер нь иргэдийн хөл хөдөлгөөн, вакцины татан авалт аль аль талаас нь авч үзвэл эхний ээлжид давтан тунг зохион байгуулах нь чухал. Хэрэв нэг, хоёрдугаар тунд иргэдийг вакцинжуулбал урт дараалал үүсэх эрсдэлтэй. Нөгөөтэйгүүр вакцины татан авалт, нөөцөө тооцох ёстой ” гэлээ. Түүний хэлснээр, УОК хөл хориог дахин 7-14 хоног сунгасан ч вакцинжуулалтыг үргэлжлүүлэх төлөвлөгөө гаргажээ.
НИЙТ 160 ЦЭГЭЭР 59803 ИРГЭНИЙГ ДАРХЛААЖУУЛНА
