БНХАУ-аас ирсэн орчуулагч эмэгтэйг тусгаарлажээ

Энэ талаар ХӨСҮТ-ийн Тандалт судалгааны албаны дарга А.Амбасэлмаагаас тодруулахад “Бээжин-Улаанбаатар, Москва чиглэлийн галт тэргэнд өчигдөр 16:50 цагт ХӨСҮТ-ийн баг үзлэг хийсэн. Тус чиглэлийн галт тэргэнд зорчиж явсан найман иргэнийг Эрээн хотод авч үлдсэн байна. Тэдэнтэй хамт явсан орчуулагч эмэгтэйг ХӨСҮТ-д авчирсан. Халдвар авсан байж болзошгүй тул урьдчилан сэргийлэх үүднээс тусгаарлаад байна.

Мөн дээрх Бээжин – Улаанбаатар – Москва чиглэлийн галт тэргэн зорчиж ирсэн 16 хүн өөрсдөө манайд хандаж, урьдчилан сэргийлэх үүднээс шинжилгээ өгсөн. Бид эдгээр хүмүүсийг үзээд ямар нэгэн өвчний шинж тэмдэг илрээгүй учраас гэрт нь буцаасан. Нөгөөтэйгүүр дээрх иргэд нь халдвар тархаж буй бүс нутгаас ирээгүй байна” гэлээ.

Дээрх 16 иргэн нь коронавирусийн халдвар авсан БНХАУ-ын иргэнтэй нэг гал тэргэнд хамт зорчоогүй гэдгийг ХӨСҮТ онцоллоо. Одоо орчуулагч эмэгтэйг ХӨСҮТ хяналтдаа аваад байгаа аж.